Eraǵamyzdy jerlep keldik... Barshyn aýyly rasymen de alys eken, joldyń jartysy qara jol. Toqym sýlap, tuıaq tozdyryp jetken myńdaǵan adamǵa qarap aǵamyzdyń baǵasyn bildik. Kóptiń ishinde Aýyl sharýashylyǵy vıse-mınıstri Arman Evneev te boldy. Sol kisiniń aýzynan:

"Bizdiń mınıstrliktiń búkil 500 qyzmetkeri bir kúndik jalaqysyn (4 mln teńge) beredi. Erlan Nurǵalıevti "Erligi úshin" mem.marapatqa usyndyq".

Aýyldastary Eraǵaǵa «bul madaq az» deıdi, sebebi ómirinde kóptegen jandy ot pen sýdan qutqaryp qalǵan eken. 20 shaqty jyl buryn ýchastkovyı bolǵanynda aınalasyndaǵy buzyqtyqpen aty shyqqan aýyldy tártipke salǵan. "Formańa rahmet aıt, áıtpegende osy jerde óler ediń", -degen baýkespelerdiń sózinen keıin, úıine baryp formasyn sheship, sport kıimin kıip, buzaqylardy jekpe-jekke shaqyryp jyndaryn basqan eken. Osy qańtardyń 30-da 53-ke tolýy kerek edi...

Jalǵyz ulynan úshinshi nemereni kútken aǵamyzdyń kelini keshe ǵana aýrýhanaǵa tolǵaqpen túsken. "Kelinim meniń týǵan kúnime óte tamasha syılyq jasamaqshy", -dep toıǵa soıar maldy ózi jemdep júripti. Al qaıǵyly oqıǵa kúni, brakonerlerdiń ekeýin jalań qolmen jaıratyp tastaǵan, qoldaryna kisen salyp jatqanda artynan úshinshi adam kelip jelkesinen myltyqpen uryp, artynsha ózgeleri kelip turǵyzbaı tepkige jyqqan. Bul sátte ekinshi ınspektor es-tússiz jatqan...

Endi aǵamnyń qyzmeti jaıly birer sóz. Tabıǵatty qorǵaý saqshylary 15 kúnge úıinen jyraq ketip jumys isteıdi, aılyqtary 100 myńǵa jeter-jetpes. Árbir kúnderi qaýip pen táýekelge baılanǵan. Sońǵy úsh jylda ınspektorlarǵa 10-astam shabýyl jasalǵan, sonyń bireýinde ǵana qylmystyq is qozǵalypty. Kóbinde aıyptylar ońaı qutylyp ketedi, tipti tabylǵan óli kıikterdiń tergeý barysynda eshkiniń eti dep jazylatynyn bilesiz be? Al aqbókenniń eti ekeni dáleldense, aıyptylar aıyppul tólep kete beretinin she, estip pe edińiz? Adam ómirine qaýip tóndirý, óltirýge talpyný degen birde-bir is qozǵalmaıdy! Sebebi - aqsha!

"Kıiktiń múıiziniń 1 kelisi 2 myń eýro, úsh múıizdiń ózi 1 kılo tartady, ol Qytaıǵa ketedi", - Bul mınıstrdiń orynbasary Arman Evneevtiń aıtqany! Al ańshylar áste kedeı adamdar emes, sońǵy markaly «Jıptermen», qymbat qural-saımandarymen júredi, Múıizder Qytaıǵa satylsa, ótkizý naryǵy bar, ony "dókeıler" basqaryp otyr degen sóz! Taǵy bir másele, tabıǵat saqshylary polıseı, ne áskerı qyzmetker bolyp sanalmaıdy, olar buzaqylarǵa jaýap retinde oq atsa, kóp jaǵdaıda sot olarǵa "Atýyńa qandaı negiz boldy? Birinshi saǵan oq atyldy degen dáleliń bar ma?", -dep ózderin kináli qylyp shyǵarady eken. Sondaı-aq, brakonerler trassaǵa shyǵyp ketse, olardy ustaýǵa tabıǵat saqshylarynyń quqy joq, sebebi ol jol polısıasynyń ókilettiginde. Zań solaı, qaıtesiz endi... Bári aýyz jalasqan, shynjyr sıaqty bir-birine baılanǵan qylmystyq júıe, tórde otyrǵan tóreleri de kóp, olar jaýapqa tartylady deý ertegi! Qysqasy TABIǴAT SAQSHYSY bolyp jumys isteý úshin ne aqymaq bolý kereksiń, ne Erlan Nurǵalıev sıaqty jan-janýardy janyńdaı jaqsy kórý kereksiń! Dalanyń ıesin óltirgenderdi, kıiktiń kıesi urmaı qoımaıdy! Topyraq salýǵa kelgen jáne eske alyp sóılegen adamdardy kórip bireý Eraǵańdy baı-manap, shendi-shekpendi dep oılar, olaı emes, ol - ADAM, kisi emes NAǴYZ ADAL ADAM bolǵan! Janyń jánnátta bolsyn, Esil Er!

Jalǵas Zeınollaevtyń feısbýk paraqshasynan