Búrkitshi Aısholpan Nurǵaıypqyzy Nursultan Nazarbaevqa armandary jaıly aıtyp berdi. Bul týraly jas búrkitshi Astana qalasynda ótip jatqan «Jastar jyly» forýmynda aıtty.
«Qurmetti Nursultan Nazarbaev, men sizben kezdesýdi qatty armandaıtynmyn, armanym oryndaldy. Prezıdentpen kúnde kezdesip jatqan joqpyn ǵoı, sol sebepti azdap qobaljyp turmyn. Men Qazaqstanda, óz Otanynda turmaıtyn 5 mıllıon qazaqtyń birimin. Mońǵolıada týyp, óstim. Alaıda týǵan ólkem, atamekenim – Qazaqstan ekenin esh ýaqytta umytqan emespin. Men qazir «Nur Orda» halyqaralyq mektebinde bilim alýdamyn. Men jaıly túsirilgen beınerolıkti álemniń 33 memleketi tamashalady. Fılm arqyly álem qazaqtyń salt-dástúrin tanydy», - dedi Aısholpan.
Sonymen qatar búrkitshi qyz Elbasyn Baıan-Ólgeıge shaqyrdy.
«Búrkitti qolyma alǵash ret 8 jasymda aldym. Búrkitti basqarý úshin erlik kerek. 13 jasymda búrkitshiler baıqaýynda birinshi orynǵa ıe boldym, rekord jańarttym. Armanym – Astana men Qazaqstannyń ózge de qalalarynda búrkitshiler mektebin ashyp, balalardy úıretkim keledi. Osy jyldy «Jastar jyly» dep ataǵanyńyzǵa raqmet. Sizdi Baıan-Ólgeıge qonaq bolýǵa shaqyramyz. Dastarhanymyzdan dám tatyp ketińiz, alystaǵy aǵaıynnyń rýhy bir jasap qalsyn», - dedi jas búrkitshi sóz sońynda.
Aıta keteıik, 2016 jyly Mońǵolıada turatyn qazaq qyzy Aısholpan Nurǵaıypqyzy týraly «Búrkitshi qyz» atty rejıser Otto Belldiń derekti fılmi shyqqan bolatyn. Alǵash ret 2014 jyly aǵylshynnyń Daily Mail basylymy «Qazaqtyń salt-dástúrindegi asyl qundylyqtardyń biri — qusbegilik ónerin ıgergen on úsh jasar jalǵyz qyz» atty Aısholpan jaıly maqala jarıalap, ony búkil álemge tanymal etti. Qandasymyz 2018 jyly Qazaqstanǵa arnaıy shaqyrýmen kelip, «Bilim-ınnovasıa» HQQ bergen grantpen «Nur Orda» mektep lıseıinde bilim alyp jatyr.
