Bul týraly «Nur Otan» partıasy Tóraǵasynyń Birinshi orynbasary Máýlen Áshimbaev óziniń Facebook áleýmettik jelisindegi jeke paraqshasynda jazdy. «Jastar jylynyń» resmı túrde bastalýyna oraı óz pikirin bildirgen ol Elbasy bergen tapsyrmalardyń oryndalýyn «Nur Otan» partıasy óz baqylaýyna alatynyn aıtqan.

«Búgin Elbasy «Jastar jylyn» resmı túrde bastap berdi. Saltanatty is-sharanyń «Nur Álem» bolashaqtyń energıasy EKSPO-mýzeıinde ótýi de tegin emes. Sebebi, Táýelsiz Qazaqstanda týyp-ósken, «Bolashaq» baǵdarlamasy arqyly álemniń eń ozyq joǵary oqý oryndarynda bilim alǵan, sanasy ashyq, tyń ıdeıalarǵa baı bizdiń búgingi jastarymyz – elimiz úshin naǵyz bolashaqtyń energıasy.

Forýmda Memleket basshysy «Jastar jylyn» naqty istermen ótkizýdiń keshendi sharalaryn jarıalap, memleket tarapynan jastardy qoldaýdyń tıimdi tetikterine nazar aýdardy. Atap aıtqanda, elimizdiń iri megapolısterinde jaldamaly baspanalar salý, jas ǵalymdarǵa granttar bólý, jas ónertapqyshtardyń startaptaryn qoldaý qoryn qurý, joǵary bilimniń sapasyn arttyryp, qoljetimdiligin qamtamasyz etý jáne jumyspen qamtý arqyly jastardyń jan-jaqty damýyna jaǵdaı jasaý kózdelip otyr. Munyń barlyǵy jastarǵa berilip otyrǵan jańa múmkindikter.

Memleket basshysy osy ıgi isterdi júzege asyrýda partıamyzdyń rólin erekshe atap ótip, «Nur Otan» jastar saıasatynyń basty draıveri bolýy kerek, dedi. Sondyqtan biz Elbasynyń senimdi tiregi retinde Memleket basshysy bergen barlyq tapsyrmalardyń tıimdi júzege asyrylýyn óz jaýapkershiligimizge alamyz. Bul iste partıamyzdyń jastar qanaty elimizdiń jastar saıasatynyń basty ortalyǵyna aınalýy tıis. Sondyqtan «Jas Otan» bolashaǵy zor, kreatıvti jáne belsendi jastardyń kúsh biriktirip, el múddesine eńbek etýin qamtamasyz etetin bolady.

Osyǵan oraı, elimizdiń barsha jastaryn «Jastar jylymen» quttyqtaımyn. «Jastar jyly» bizdiń óskeleń urpaqqa mol múmkindikter berip, jańa bıikterge jol ashyp berdi. Osy jolda ár qazaqstandyq jasqa sáttilik pen tabys tileımin», – delingen jazbada.