Qazaq boksshysy Sadrıddın Ahmedov 27 qańtar kúni Monreal qalasynda kásipqoı bokstan jastar arasynda álem chempıony ataný úshin aıqasqa túsedi.

Sadrıddın 20 jasynda kásipqoı boksqa bet burdy. Ol  Kanadanyń «Eye  of tye Tiger» proýmoterlik kompanıasymen kelisimge kelip, 2018 jyly alty jekpe-jekti nokaýtpen utyp úlgerdi. Sadrıddınniń kelesi qarsylasy – 22 jastaǵy meksıkalyq Abraham Hýares (12-1, 4 KO). Bul ekeýi WBC versıasy boıynsha 10 raýndtyq aıqasta jastar arasyndaǵy álem chempıony ataǵyn sarapqa salady.

Sadrıddın 10 jasynan astanalyq tájirıbeli bapker Máýlet Mustafınniń qol astynda ter tókti. Sadrıddınniń ákesi Ámirhan Astanaǵa otbasymen Jetisaıdan kóship kelgen eken.  Áńgime barysynda Máýlet aǵamyzdan «Sadrıddınniń ulty kim?» dep suradyq. «Qazaq, - dedi Mákeń kúlip.- Maǵan bul suraqty qoıýshylar az bolǵan joq. Sadrıddındi on jyldaı baptaı júrip, talaı qujat toltyrdym. Ákesi men sheshesiniń pasportynda «qazaq» dep jazylǵan. Sadrıddınnen kisiler «qaı ultsyń?» dep surasa, «naǵyz qazaqpyn!» dep jaýap beredi. Qazaqshaǵa aǵyp tur».

QR eńbek sińirgen jattyqtyrýshysy Máýlet Mustafın men shákirti Sadrıddın Ahmedov

Sadrıddın 2011 jyly kishi jasóspirimder arasynda Qazaqstan birinshiligin 36 keli salmaqta utsa, 2015 jyly 64 kelide respýblıkanyń jastar chempıonatynda úzdik shyqty. Tórt jylda 28 kelige aýyrlaǵan. Iaǵnı, jylyna orta eseppen 6,5 keliden qosyp otyrǵan eken. Bul degenińiz Máýlet bapkerge qosymsha beınet degen sóz. Dene aýyrlaǵan saıyn boksshyny jańa salmaqqa beıimdeý kerek. Qarsylasyń únemi ózgerip turady. Salmaqpen birge qoldyń kúshin, soqqynyń tegeýrinin, urys tásilin jetildirip otyrmasań, jáne bolmaıdy. Jańa salmaqqa psıhologıalyq jaǵynan beıimdelý, jańa qarsylastardy zertteý de ońaı sharýa emes. Bul jyldary Máýlet bapker tynymsyz izdenis ústinde boldy. «Sadrıddınnen úmit kútip, túzde kóp júrdim. Jarystan kele sala úıde shamaly ýaqyt tize búgip, jattyǵý jıynyna asyǵamyz. Ony shyńdaý úshin kúndiz-túni izdenýge týra keldi. Eńbekqor, qaıratty bala áýesqoı boksta ekpindep-aq kele jatyr edi. 2017 jyly ákesi Ámirhan ekeýi kásipqoı boksqa aýysamyz, dedi. Qalaı qarsy bolasyń? Ámirhan otbasymen Astanada páter jaldap turady. Tórt balasy bar. Jaǵdaılaryn kórip,bilip júrgen soń balanyń baǵyn baılamaıyn dedim».

Aı, shirkin, qazaq bapkerleri-aı! Senderdiń keń peıilderińe, tabandy tirlikterińe, adam tánti bolar tózimderińe, qara jerdeı sabyrly minezderińe Alla razy bolsyn! Shákirtterin kýpege mingizip, ózderi plaskard vagonda, ne tambýrda júrse de qabaǵyn shytpaıtyn aqıyq baýyrlarym sol! Óz balasyna qaraýǵa ýaqyt tappaı júrip, kisi balasy dese, aýzyndaǵysyn jyryp beretin ańqyldaǵan azamattar-aı! Sadrıddın Máýlet aǵasynyń baptaýymen 2016 jyly jastar arasynda álem chempıonatynda top jardy. 2017 jyly eresekter rıngine qadam basyp, «myqtymyn!» dep júrgen talaı boksshyny eriksiz tuqyrtqany bar. Jalpy, ıisi musylman jurty ustazdyń qadirine jete bilgen. Sportty baıaǵyda doǵarsa da, ustazdaryn alaqanyna salyp júrgen tekti jigitter qazaqta az emes.  Iá, Sadrıddın Kanadada atoı salyp jatsa, elde Máýlet ustazy taqymyn qysyp otyrady.

Máýlet bapker myńdaǵan jankúıermen birge Sadrıddınniń Abraham Hýarespen jekpe-jegin taǵatsyzdana tosyp júr. Tarazynyń bir basynda búkil Alash jurtynyń namysy turǵanyn esten shyǵarma, Sadrıddın baýyr!

Qydyrbek Rysbek