Venesýelanyń Ulttyq assambleıa basshysy Hýan Gýaıdo ózin ýaqytsha prezıdent qyzmetin atqarýshy retinde tanystyryp, búkil jurtshylyqtyń kózinshe ant qabyldady. AQSH prezıdenti Donald Tramp, óz kezeginde, Gýaıdony eldiń basshysy retinde moıyndaıtynyn aıtty. Bul jaıynda Qamshy.kz aqparat agenttigi jergilikti BAQ-tyń derekterine súıene otyryp jazady.

Venesýela halqy birneshe jyldan beri qazirgi prezıdent Nıkolas Madýronyń otstavka ketýin talap etip júrgeni belgili. Al birer kún buryn Karakas halqy kóshege shyǵyp, mıtıń uıymdastyrdy. Qarasha halyq Madýroǵa qarsy shyǵyp, Gýaıdony qoldaıtynyn bildirdi.

Gýaıdo halyqtyń aldynda oń qolyn júregine qoıyp: «Bılikti tartyp alýǵa shekteý qoıýǵa, ótpeli úkimetti qalyptastyrýǵa jáne saılaýdy ádil ótkizýge ant beremin» - dedi.

Joǵaryda atap ótkenimizdeı, Donald Tramp opozısıa lıderi Gýaıdony resmı túrde Venesýela prezıdenti retinde moıyndaıtynyn aıtqan.

«Venesýela halqy batyl qadam jasap, Madýroǵa jáne onyń júıesine qarsy shyǵyp, bostandyq pen ádildikti, báriniń zańdy túrde sheshilýin talap etip otyr», - deıdi Tramp.

Óz sózinde ol Madýrony "zańsyz otyrǵan prezıdent" dep atap, al eldegi parlament – Venesýela halqynyń tańdaýy boıynsha saılanǵan jalǵyz zańdy organ ekendigin aıtyp ótti.

Soltústik Koreıa men Ońtústik Afrıka elderin biriktirip otyrǵan amerıkalyq memlekettik uıymdar da Gýaıdony prezıdent ertinde moıyndaıtynyn málimdedi.

«Gýaıdony ýaqytsha prezıdent qyzmetin atqarýshy laýazymymen quttyqtaımyz. Biz sizdi tolyqtaı qoldaımyz jáne elde demokratıany qalyptastyrady dep senemiz», - dep jazady uıymnyń bas hatshysy Lýıs Almagro óziniń áleýmettik jelidegi paraqshasynda.

Aıta keteıik, qańtar aıynda ekinshi ret prezıdent taǵyna otyrǵan Nıkolas Madýro sársenbi kúni AQSH-pen dıplomatıalyq qarym-qatynasty úzip, amerıkalyq dıplomattarǵa elden ketýge 72 saǵat ýaqyt berdi.

«Men AQSH-pen dıplomatıalyq jáne saıası qarym-qatynasty úzýge sheshim qabyldadym. AQSH-tyń ımperıalısik úkimeti Venesýelada tóńkeris jasap, qýyrshaq úkimetti qurýdy basshylyqqa aldy. Donald Tramptyń Venesýelaǵa qarsy júrgizip otyrǵan saıasaty eldi bólip tastaý, onyń demokratıalyq ınstıtýttaryn joıyp, úkimetti konstıtýsıalyq emes quraldarmen basyp-janshý», - deıdi Madýro.

Onyń aıtýynsha, AQSH bıliginiń qoldaýy arqasynda oppozısıonerler memlekettik tóńkeris jasaýǵa tyrysqan. Sondaı-aq, Madýro qolynan kelgenshe eldiń táýelsizdigin saqtap qalatynyn jetkizdi.

«Biz táýelsiz elmiz jáne ózge eldermen dıplomatıalyq qarym-qatynasymyzdy úzbeımiz. Sonymen qatar, biz konstıtýsıalyq tártipti qalpyna keltirýge mindettimiz», - dep aıtyp ótti Madýro.

Venesýela prezıdenti amerıkalyq dıplomattarǵa: «Kózderińdi qurtyńdar! Venesýelany jaıyna qaldyryńdar. Mundaǵy adamdardyń da namysy bar!» - dep olarǵa  72 saǵatta elden ketýge ýaqyt berdi.

Venesýelanyń Joǵarǵy soty eldegi opoozısıalyq parlamentke qarsy qylmystyq is qozǵap, aldyn ala tergeý bastaǵanyn málimdedi.

Elde osymen úshinshi kún mıtıń jalǵasýda. Belgili bolǵanyndaı, qarsylyq aksıasynyń saldarynan 16-ǵa jýyq adam qaza tapqan, onyń ishinde 16 jastaǵy jetkinshek te bar eken. Jergilikti BAQ-tyń habarlaýynsha, jappaı qarsylyq  sharalary ózge qalalarda da jalǵasyn tappaq.

Daıyndaǵan: Nazerke Labıhan