Qazaq aqyny Orazaqyn Asqar dúnıe saldy dep jazady Qamshy.kz aqparat agenttigi. Bul málimetti Qazaqstan Jazýshylar odaǵynyń baspasóz qyzmeti men QR Mádenıet jáne sport mınıstrligi rastady. 

"Orazaqyn Asqar qaıtys boldy. Aqynmen qoshtasý rásimi Jazýshylar odaǵynda ótedi, ýaqytyn qosymsha habarlaımyz", - dedi odaqtaǵylar.

Al mınıstrliktiń aıtýy boıynsha Orazaqyn Asqar birneshe saǵat buryn Almatyda aýyr syrqattan qaıtys bolǵan. 

Orazaqyn Asqar 1935 jyly 16 mamyrda Shyǵys Túrkistan ólkesiniń İle aımaǵyna qarasty Múkeı Qaratas degen jerde dúnıege kelgen. Bastaýysh bilimdi Sarybulaq mektebinde alyp, Qulja qalasyndaǵy "Bilim jurty" dep atalatyn gımnazıada oqyǵan. 1951 jyly Úrimshi qalasynda ashylǵan Ulttar ınstıtýtynyń til jáne ádebıet fakúltetine túsip, onyń ekinshi kýrsyn aıaqtaǵannan keıin "Shyńjań gazeti" redaksıasyna qyzmetke turady. Bul jyldary sol gazetke jáne "Shuǵyla" jýrnalyna óleńderi jıi jarıalana bastaıdy.

1955 jyly atamekeni Qazaqstanǵa kóship kelip, 1961 jyly Qazaq Memlekettik ýnıversıtetiniń fılologıa fakúltetin bitirip shyǵady. 1955 jyly jaryq kórgen "Qos júrek" atty jas aqyndardyń ujymdyq jınaǵyna óleńderi engen.

Biraz jyl Qazaq KSR Ǵylym akademıasynyń Sh.Ýálıhanov atyndaǵy Tarıh, etnografıa jáne arheologıa ınstıtýtynda kishi ǵylymı qyzmetker, odan keıin Qazaqstan Jazýshylar odaǵynyń kórkem ádebıetti nasıhattaý búrosynda nusqaýshy, respýblıkalyq Kitap palatasynda bólim meńgerýshisi, "Jalyn" baspasynda aǵa redaktor bolǵan. Qazaqtyń qara óleńin jınap, eki tomyn bastyrdy.

"Balaýsa" baspasynda "Ádebı mura" baǵdarlamasyna oraı, "Álem balalar ádebıetiniń "qazaq tilindegi elý tomdyǵyn shyǵarý jumysyna atsalysqan.

1996 jyldan beri Qazaqstan Jazýshylar odaǵy basqarmasynyń múshesi. Halyqaralyq "Alash" ádebı syılyǵynyń laýreaty. "Eren eńbegi úshin", "Táýelsizdiktiń 10 jyly" medaldarynyń ıegeri. Muqaǵalı atyndaǵy syılyqtyń ıegeri. Panfılov aýdanynyń Qurmetti azamaty.

Usynǵan: Ásel Bolatqyzy