Halyqaralyq Olımpıada komıtetiniń prezıdenti qazaqtyń bas jasar balasyna aq batasyn berdi, dep jazady Qamshy.kz aqparat agenttigi Abctv.kz saıtyna silteme jasap.

Shveısarıada ótip jatqan Halyqaralyq sport basylymdary qaýymdastyǵynyń (AIPS) 82-inshi Kongresinde qyzyqty oqıǵa boldy. Lozannaǵa AIPS Sports Media Awards báıgesiniń jeńimpazdaryn marapattaýǵa kelgen HOK prezıdenti Tomas Bah qazaqtyń bes jasar balasymen «semserlesti»...

2014 jyly qazan aıynda Halyqaralyq Olımpıada komıtetiniń prezıdenti Tomas Bah resmı saparmen Almatyǵa kelgen bolatyn. Sonda Qazaqstan sport basylymdary qaýymdastyǵynyń prezıdenti İlıas Omarov bir jastan asqan uly Áltaıyrdy ertip baryp, qazaqy dástúrmen tusaýyn Bahqa kestirgen edi.

Qazir İlıas Omarov Osloda turady. Jumys barysymen Norvegıaǵa aýysqan. Tomas Bahtyń AIPS Kongresine keletinin estip, Áltaıyrdy taǵy ertip bardy. Sebebi uly semserleý sportyna qatysady. Al Tomas Bah – jáı ǵana basshy emes, burynǵy sportshy. Sporttyń osy túrinen 1976 jylǵy Monreal Olımpıadasynyń chempıony. 1977 jylǵy álem chempıony.

Tomas Bah qazaq balasynyń tusaýyn keskenin umytpapty. Jymıa kúlip, esine aldy. Ári qolyna rapıra ustap, semserlesý sportymen aınalysyp júrgen Áltaıyrǵa aq batasyn berdi. Tipti semserlesý sportynyń termınderin aıtyp, Áltaıyrdyń ár túrli ádisterdi oryndaýyn ótindi...

Ózi onyń rapırasyn denesine tıgizbeı, jaltaryp otyrdy. «Syry ketse de, syny ketpegen» qas sheber ekendigin kórsetti. Sodan soń Áltaıyrǵa ıgi tilekterin aıtyp, arqasynan qaqty. Al İlıas Halyqaralyq Olımpıada komıteti prezıdentiniń ıyǵyna qazaqtyń oıýly shapanyn jaýyp, syı-qurmet kórsetti. 

Halyqaralyq Olımpıada komıtetiniń prezıdenti Tomas Bahtan bata alǵan qazaq balasy kishkentaı bolsa da, ózine úlken senim artylǵandyǵyn sezetin sıaqty. HOK prezıdentiniń aq batasy onyń tanymal sportshy bolýyna yqpal etip, baǵyn ashsa, nur ústine nur emes pe? Semserlesý sportynan qazaqtan da Olımpıada chempıony shyǵýyna tilektespiz... 

Marýan Túsip