Erbolat QASYMOV, «QR Prezıdentiniń «Qazaqstan – 2050» strategıalyq baǵdarlamasyn qoldaý» qoǵamdyq qorynyń prezıdenti, Almaty qalalyq máslıhatynyń depýtaty:
Keshe Elbasy Nursultan Ábishuly Nazarbaev Jastar jylynyń saltanatty ashylý jıynynda Qazaqstannyń bolashaǵyn jastarǵa senip tapsyrýǵa bolatynyn aıtty. Jalpy, qashan da bizdiń Prezıdent barlyq Joldaýynda, baǵdarlamalyq maqalalarynda jastarǵa senim, úmit arta sóıleýden jalyqqan emes. Men de ókshemizden kele jatqan ini-qaryndastaryma senemin, olardyń istep jatqan úlken tirlikterine qarap súısinemin. Sol jastar bizdiń memleketti jaqyn bolashaqta aldyńǵy qatarly ozyq 30 eldiń qataryna qosatynyna da senemin. Ol úshin bizdiń taraptan, árıne, kómek, qoldaý aýadaı qajet.
Men kásipker retinde de, óz elimniń patrıot uly retinde de jastardyń bilimdi, sergek, oıly bolǵanyn qalaımyn. Sol úshin Almatydaǵy kólemi 1000 sharshy metrden asyp jyǵylatyn Jambyl atyndaǵy jasóspirimder kitaphanasyn alty aıdyń ishinde zamanaýı úlgide jóndep, jabdyqtap berdik. 145 mln. teńgeden astam qarajat quıylǵan bul kitaphanaǵa buǵan deıin kúnine 100-ge jýyq adam kelgen bolsa, qazirgi tańda olardyń sany birden 5-6 esege artqan.
Qabyrǵalary ózimizdiń uly Abaıdyń, Jambyl babamyzdyń, Muhtar Áýezovtiń, taǵy basqa da qazaq zıalylarynyń naqyl sózderimen órnektelgen kitaphana búginde qalanyń aınasy desek te bolady. Árıne, qazir úlken-kishiniń báriniń qolynda uıaly telefon bar. İzdegen aqparatyn alysqa uzamaı-aq úıde otyryp ǵalamtorǵa kire berse bolady. Al sol adam úıinde jalǵyzdan-jalǵyz qamalyp otyrmaı, syrtqa shyǵyp, kitaphanaǵa keletin bolsa, jan-jaǵyna úńilip, ekinshi bireýmen oı qosyp, pikir jarystyryp, kitaptan alǵan-túıgenin, bilgenin ózgelermen bólisip jatsa, onda bizdiń maqsatymyzǵa jetkenimiz.
Men depýtat bolyp saılanǵan aımaqta alty mektep bar eken, bárin de aralap shyqtym, dırektorlarymen sóılestim, birinshi kezekte ne qajet ekendigin surap bildim. Bári de bir aýyzdan mektep aýlasyna sport alańdary kerek ekendigin aıtqan bolatyn. Árıne, alty mektepke túgel bir mezette sport keshenderin salyp berý múmkin emes. Sondyqtan mektep dırektorlaryn, aýdandyq bilim bólimi basshylaryn, «Nur Otan» ókilderiniń basyn qosyp, aldaǵy UBT-dan eń joǵary bal jınaǵan mektepke sport keshenin salyp beremiz degen sheshimge kelgen bolatynbyz. Sóıtip bul talap boıynsha №126 mektep-lıseıdiń baǵy janyp, qazirgi ýaqytta osy bilim oshaǵynyń aýlasyna eki úlken alań salý jumystary qarqyndy júrip jatyr. Biri – fýtbol, ekinshisi basketbol alańy bolmaq. Bul iri jobany aldymyzdaǵy kóktemde bitiremiz dep otyrmyz.
Aıtpaqshy, bul biz salǵan úshinshi sport alańy. Onyń aldynda shahardaǵy K.Baıseıitova atyndaǵy daryndy balalarǵa arnalǵan mýzyka mektebiniń fýtbol jáne basketbol alańdaryn biriktirgen, eýropalyq talaptarǵa jaýap beretin úlken keshen salyp berdik. Biz «minekeı, sport keshenderińizdi salyp berdik, boldy, endi ary qaraı ne isteseńizder de óz erikterińizde» dep qarap otyrmaımyz. Almatydaǵy ár aýdanda 30 mektepten bolsa, keleshekte solardan 30 komanda jasaqtasaq, bul degenińiz úlken kúsh. Sóıtip fýtboldan, basketboldan mekteparalyq, aýdanaralyq jarystar, týrnırler uıymdastyryp, onyń barlyq shyǵynyn ózimiz kóterip otyrsaq, ol da bolsa búgingi urpaǵymyzdyń oıly, boıly azamat bolyp ósýine qosqan úlesimiz bolar edi. Bálkim, sol jetkinshekterdiń arasynan bolashaqta táýelsiz elimizdiń temirdeı myǵym qazyǵy bolar jalyndy jastar ósip shyǵar. Men jaqsy kúnderden úmittimin.
