Májiliste depýtat Serik Sápıevtiń ókilettigin toqtatý týraly sheshim qabyldandy, - dep habarlaıdy Qamshy.kz aqparat agenttigi Tengrinews.kz deregin negizge alyp. Bul týraly Májilistiń jalpy otyrysynda belgili boldy.
Sheshimdi Ortalyq saılaý komısıasynyń tóraǵasy Baqyt Meldeshov oqydy.
– QR Ortalyq saılaý komısıasy otstavkaǵa ketý jaıly ótinishtiń túsýine baılanysty Qazaqstan Parlamenti Májilisiniń depýtaty Sápıev Serik Jumanǵalıulynyń ókilettigin merziminen buryn toqtatý máselesin sheshýge usynys jasaıdy, - dedi Meldeshov.
Depýtattar daýys berip, Sápıevtiń ókilettigin toqtatý týraly sheshim qabyldady.
– Qurmetti Serik Jumanǵalıuly, sizge parlamentte bizben birge atqarǵan jumysyńyz úshin barlyq depýtattyq korpýs atynan alǵys aıtamyz. Sizge memlekettik qyzmettegi jańa ornyńyzda sáttilik tileımiz»-, - dedi Májilis spıkeri Nurlan Nyǵmatýlın.
Serik Sápıev áriptesterine alǵysyn aıtty.
– Osy múmkindikti qoldana otyryp, bizdiń Memleket basshysy, partıa tóraǵasyn Nursultan Ábishuly Nazarbaevqa sportta osyndaı senim bildirgenine alǵys aıtqym keledi. Sondaı-aq, sizge Nurlan Zaırýllauly jáne qurmetti áriptesterimniń árqaısyna aıtqan keńesteri, kórsetken qoldaýlaryna, Parlament Májilisinde jınaǵan tájirıbe úshin alǵys bildiremin. Elimizdiń órkendep, qoǵamymyzdyń damýy úshin sizdermen áli de osyndaı qarqynmen jumys isteımiz dep senemin, - dedi Sápıev.
Eske salaıyq, Serik Sápıev Májilis depýtaty qyzmetine 2017 jyldyń aqpanynda kelgen edi.
Usynǵan: Ásel Bolatqyzy
