El astanasy Karakasta saıası teketires órship tur. Tolas tapqan joq. Bir elde – eki prezıdent. Biri Nıkolas – Madýro, ekinshisi – Hýan Gýaıdo. Qazir ekeýi de elde bilgenin istep jatyr. Gýaıdony AQSH pen onyń onnan astam odaqtastary qoldaıdy jáne olar yqpalyn ashyq kórsetip otyr. Al Madýronyń jaǵynda Reseı, Qytaı bastaǵan  bes-alty memleket bar. Ázirge teketires órship tur.

AQSH bıligi Venesýelanyń PDVSA munaı kompanıasynyń aktıvindegi 7 mıllıard dollaryn buǵattaý týraly sheshim qabyldady jáne atalǵan kompanıamen kelisimshart jasaýǵa tyıym saldy. Oǵan jaýap retinde Venesýela prokýratýrasy AQSH qoldap otyrǵan kandıdat Gýaıdonyń jolyn kesti. Endi Ulttyq Assambleıanyń basshysy Gýaıdo elden eshqaıda shyǵa almaıdy. Al Anglıa bıligi Madýronyń ıeligindegi altyndardy buǵattady. Sóıtip, qazirgi ýaqytta Madýro men Gýaıdonyń arasynda qarama qaıshy teketires júrip jatyr. Biraq bul qansha ýaqytqa deıin sozylady? Bir aıǵa, joq álde bir aptaǵa ma? Buǵan qatysty sarapshylar ne deıdi? Eger bul joly Nıkolas Madýro prezıdent retinde óz ornyn saqtap qalsa, onda muny Reseıdiń jeńisi dep boljam jasaýǵa bolar. Óıtkeni Venesýela ekonomıkasyna  resmı Máskeý 17 mıllıard dollar aqsha salǵan. Bul elde sondaı-aq Qytaıdyń da múddesi bar. Óıtkeni Qytaıǵa munaı kerek.  AQSH-tyń da kózdep otyrǵany – qara altyn.

Amerıkalyq memleketter uıymynyń jańa ókili Gýstava Tarre «Qytaı bizdiń elde bıznesin júrgizip jatsa, al Reseıdiń geosaıası ambısıasy bar. Sondyqtan Madýrony barynsha saqtap qalýǵa tyrysady» dep málimdedi.  Anyǵyna kelgende,  Venesýeladaǵy daǵdarystyń bastalǵanyna 9 kún boldy. Biraq basty áńgime Madýronyń qanshalyqty ornyn saqtap tura alatyndyǵynda. Reseı Ǵylym akademıasynyń Latyn Amerıka ınstıtýty dırektorynyń mindetin atqarýshy Dmıtrıı Razýmovskıı «Madýro uzaq ýaqyt ornyn saqtap qala alady» degenge senbeıdi.

–Qysqa merzim ýaqyt aralyǵynda ol prezıdent retinde jumysyn jalǵastyra beredi. Biraq uzaq ýaqyt bılikte bolady deý senimsiz. Qazir ol ózin senimdi sezinip otyr, óıtkeni elektorattyń jartysy ony qoldap otyr. Ekinshiden, eldiń qarýly kúshteri áli Nıkolas Madýronyń jaǵynda,–deıdi reseılik sarapshy.

Biraq Dmıtrıı Razýmovskıı «eń ary ketkende Madýro alty aı ǵana bılikte shydaıdy» degen pikirde. Ary qaraı Madýronyń saıasatyn jalǵastyrýshy adam bılikke kelýi múmkin. Biraq bul boljamnyń júzege asýy qıyndaý. Búgingi kúni AQSH qoldap otyrǵan Hýan Gýaıdonyń  saıası ambısıasy joǵary tur...