Qashan da óziniń birjaqty pikirlerimen jurtshylyqqa tanys LDPR kósemi Vladımır Jırınovskıı Memlekettik Dýmada sóılegen sózinde TMD aýmaǵyndaǵy keıbir elderdi Reseı quramyna kirýge shaqyrdy. Ol úshin aldymen Konstıtýsıany ózgertý kerek, sosyn olardy qosyp alý qajet.

«Orys álemin keńeıtý kerek» degen Jırınovskıı mundaı tájirıbeniń ómirde bar ekenin aıtty. Zańdyq turǵydan kelgende, 2014 jyly Qyrym Respýblıkasynyń halqy tańdaý jasap, Reseıge qosylatynyn málim etken. Biraq anyǵyna kelgende, Reseı Qyrymdy anneksıalady emes pe? Biraq oǵan qarap otyrǵan LDPR kósemi joq.

Bul jerde Vladımır Jırınovskıı neni meńzep otyr? Naqty aıtsaq, Grýzıadaǵy Ońtústik Osetıa men Abhazıa, Ýkraınadaǵy Donesk men Lýgansk, Moldovadaǵy Prıdnestrove men Belorýssıanyń batys aımaǵynda qazir Reseıdiń yqpaly kúshti. Biraq munyń barlyǵy da orystardyń qolymen «ot kósep», «ystyq núktege» aınalǵan  aımaqtar ekenin umytpaǵanymyz jón. Reseıdiń zań shyǵaratyn Memlekettik Dýmasynyń minberinen sóz sóılegen Jırınovskıı Konstıtýsıaǵa ózgerister engize otyryp, atalǵan aımaqtardy birjolata Reseıge qosyp alý kerek dep otyr. Orys áleminiń kókjıegin ózgertip, gergrafıalyq kartasynyń aýmaǵyn keńeıtkisi kelip otyrǵany da sodan.

–Biz qalaı aıtqanda da, Reseıdiń Konstıtýsıasyn ózgertýimiz kerek. Álem tarıhynda mundaı oqıǵa bolǵan. 1990 jyly Germanıa Federatıvtik Respýblıkasy (FRG) ózderiniń Konstıtýsıasyn ózgerte otyryp, GDR –dy quramyna qosyp aldy. Demek, bizge de múmkindik bar, –dedi Vladımır Jırınovskıı.

Qashan da orys shovınızmin tý etip kóterip júrgen jyndynyń bul sandyraǵy jurtqa jaǵa qoımas. Biraq orys bıligine sonaý 1991 jyldan beri Memlekettik Dýmada máńgilik depýtat bolyp kele jatqan Jırınovskııdiń aıtqandary únemi jaǵady...Óıtkeni ımperıalyq pıǵyly jaman orysqa Jırınovskııler ár ýaqytta kerek.