Astanada jeke úılerdiń birinde bolǵan joıqyn órt saldarynan 5 bala qaza tapty. Jantúrshigerlik oqıǵanyń saldarynan orny tolmas qazaǵa ushyrǵan otbasyǵa "Nur Otan" partıasynyń birinshi hatshysy Máýlen Áshimbaev kóńil aıtyp, dál qazir olarǵa qoldaý kórsetý kerektigin jetkizdi, dep jazady Qamshy.kz aqparat agenttigi.

"Astanadaǵy úılerdiń birinde tilsiz jaýdyń zardabynan bolǵan qaıǵyly oqıǵa bizdiń de qabyrǵamyzdy qaıystyryp ketti.

Qapyda kóz jumǵan balalardyń ata-analaryna orny tolmas qaıǵylaryna ortaqtasyp, kóńil aıtamyz.

Qaıǵy bólisse, azaıady. Sondyqtan dál qazir sózben aıtyp jetkize almaıtyn aýyr qaıǵyǵa dýshar bolǵan ata-anaǵa demeý bolyp, qoldaý kórsetýdiń mańyzy zor", - deıdi Máýlen Áshimbaev.

Sondaı-aq, Astana qalasynyń ákimi Baqyt Sultanov bes bala qaıtys bolǵan órttiń mán-jaıyn anyqtaýdy talap etti.

Ákimdiktiń baspasóz-qyzmetindegilerdiń habarlaýynsha, zardap shekken otbasyǵa qarjylaı kómek kórsetiledi. Baqyt Sultanov «Kóktal-1» turǵyn alabynda oryn alǵan qaıǵyly jaǵdaıǵa baılanysty shuǵyl jıyn ótkizdi.

«Osy jaǵdaıǵa dýshar bolǵan otbasyna qaıǵyra kóńil aıtamyn. Qala basshylyǵy oqıǵa ornynda boldy, qaza tapqan balalardyń ata-anasymen psıhologtar jáne áleýmettik qyzmet mamandary jumys isteýde. Zardap shekken otbasyna qalalyq áleýmettik qorǵaý basqarmasy tarapynan materıaldyq kómek kórsetiledi. «Saryarqa» aýdany ákimine jerleý rásimin uıymdastyrýdy jáne otbasyna ýaqytsha baspana berýdi, janǵan úıdi tez arada qalpyna keltirý úshin qarajat bólýdi tapsyramyn», - dedi qala ákimi.

Óz kezeginde, TJD bastyǵynyń mindetin atqarýshy Marǵulan Amanbaev, osyǵan deıin «Kóktal-1» turǵyn alabynda órt jáne basqa da tótenshe jaǵdaılar boldyrmaý úshin profılaktıkalyq jumystar júrgizilgeniń aıtty. «Sol kezde TJD –niń qyzmetkerleri bul úıge barǵan, olqylyqtardy joıý úshin eskertpe berilgen», - dedi Amanbaev.

Baqyt Sultanov aýdan ákimderi men tótenshe jaǵdaılar departamenti jáne polısıaǵa birlesip dereý jeke sektordaǵy ár úıge baryp órt qaýipsizdigi erejelerin saqtaý turǵysynda tekseris, túsindirý jumystaryn júrgizýdi talap etti.

«Bul sizderdiń tikeleı jumystaryńyz, men árqashan aıtyp otyrmaýym kerek! Baıaǵyda júrgizý kerek edi, mindetti túrde qaıǵyly oqıǵany kútesizder me?! Bul TJD-niń qateligi. Sizder jeke sektorda turatyn ár adamdy jekeleı tanýlaryńyz kerek», - dedi ol.

Qala ákimi quzyretti organdarǵa bolǵan jaǵdaıdyń barlyq mán-jaıyn anyqtaýdy tapsyrdy. 4 aqpan kúni túnde «Saryarqa» aýdanyndaǵy «Kóktal-1» turǵyn úı alabynda órt shyǵyp, onda jeke úıdiń aýmaǵyndaǵy shaǵyn úı órtengen. Órt saldarynan 2006, 2009, 2014, 2016, 2018 jyly týǵan bes bala qaıtys boldy. Eń kishisi nebári úsh aıda bolǵan.