Astanadaǵy úılerdiń birindegi órtten bir otbasynyń 5 balasy túgeldeı qaıtys boldy. Olardyń úlkeni 12 jasta, kishisi jasqa da tolmaǵan eken. Al qaıǵyly oqıǵa kezde balalardyń ata-anasy jumysta bolǵan eken. Balalarynan túgel aıyrylǵan otbasyna búkil Qazaqstan qaıǵyryp kóńil aıtady. Ári «qaıǵyly oqıǵaǵa kim jaýapty?» degen suraqqa árkim jaýap izdep álek. Osy tusta zańger Aıgúl Orynbek bar jaýapkershilikti Eńbek jáne áleýmetti qorǵaý mınıstri Madına Ábilqasymovaǵa artty. Kúni keshe mınıstr «kóp balaly ata-analar úshin 16 myń teńge járdemaqy tym kóp» dep jar salǵan bolatyn.

♦Kópbalaly ana: Jerge túsińiz, Ábilqasymova hanym!

«Madına Ábilqasymova, "16 myń jetedi!"- dep búkil álemge jar salyp ediń! Bes balanyń ólimi seniń moınyńda!
16 myń jetse, baıǵus ana tún ishinde jumys istep nesi bar?
Qý jetispeýshilik, «shyryldaǵan balalarǵa qaıtsem, nan taýyp berem» dep júrgen ana botalap qaldy aý!
Bul – bir ulttyń qasireti! 
Áleýmettik jaǵdaıy jaqsy, damyǵan otyz eldiń qataryna kirgen rýhanı jańǵyrǵan memleket kóp balaly analardyń jaǵdaıyn jasaı almaı otyr!
Shanel-manel kıgen mınıstrler, "qorqaq" úkimet shyǵyńdar kóshege, aýyldarǵa! Kórińder halyqtyń jaǵdaıyn!
Sender kórmeı júrgen joqsyńdar, sender kórip júrip kózderińdi tas qylyp baılap alǵan kór soqyrsyńdar!
Beıbitshilik zaman, qaýipsiz elde bes bala otqa janyp ketip otyr.
Ólgen jas sábılerdiń kúli senderdiń moıyndaryńda!», - dep ashynyp jazdy Aıgúl Orynbek óziniń Feısbýktegi paraqshasyna.

Qaıǵyly oqıǵa dúısenbige qaraǵan túni bolǵan. Saryarqa aýdany Shyńǵystaý kóshesinde ornalasqan "vremánkada" túngi úshte órt shyqqan. Kóp uzamaı ýaqytsha salynǵan baspananyń shatyry qırapty. Tilsiz jaý týraly habar órt sóndirý qyzmetine 03.24 kezinde jetken, órt sóndirýshiler jalyndy bir saǵattan soń sóndirdi. Janyp ketken úıden 2006, 2008, 2013, 2015 jáne 2018 jyldary týǵan balalardyń denesi tabylǵan.

Olardyń ata-anasy tótenshe oqıǵa kezinde jumysta bolypty.

Órt aýmaǵy – 30 sharshy metr, jalyndy sóndirýge 17 órt sóndirýshi men 5 kólik qatysqan, budan bólek tótenshe jaǵdaılar komıtetiniń ortalyq óńirlik aeromobıldi jedel qutqarý jasaǵynan tórt adam men bir kólik jumyldyrylǵan.

Usynǵan: Gúlim Jaqan