Alyp adamnyń ishki aǵzasyna kirip kórgińiz kele me? Nıderlandta bul ábden múmkin nárse. Sebebi elde adam denesiniń alyp murajaıy bar. Tabaldyryǵyn attaǵan boıda ózińdi naǵyz adamnyń ishine enip ketkendeı sezinesiń. Qamshy.kz aqparat agenttigi oqyrmanyn adam aǵzasyna saıahattaýǵa shaqyrady. 

Murajaı Nıderland astanasy Leıden qalasynda ornalasqan. Ǵımarattyń beınesin adamǵa uqsatyp jasaǵan, al ishine kirer esigi álgi «adamnyń» tizesinde eken. Murajaı birneshe qabattan turady.

İshine kiretin adamnyń júıkesi de myqty bolýy tıis. Sebebi adamnyń túrli aǵzasynan quralǵan qalalardy kóresiz.

Adamnyń san eti men qannyń aq jáne qyzyl túıirshikterinen bastalǵan sapar budan ári qyza túsedi. Adam aǵzasy murajaıy jalpy 7 qabattan turady.

Ásirese, bul fızıologıany erekshe jaqsy kóretin jandar úshin taptyrmas múmkindik, sebebi bári shynaıy ispettes. İshine kirgen adam qannyń qyzmeti, júrek soǵysy, tamyr soǵysyn baqylap júretin shybyn-shirkeı sekildi. Estý qabileti, bulshyq et júıesi, dybys baılanystary, súıekter men tisteri – bárin tyńǵylyqty zerttep alýǵa bolady.

Ár aǵzanyń jumysy arnaıy monıtordan kórsetiledi, tipti shynaıy daýsyn da estýge bolady. Adam balasy ózin alyp adamnyń ishine kirip ketkendeı sezinedi. Ekskýrsıa arnaıy kózildiriktermen tipti qyza túsedi.  

Bir qyzyǵy, murajaıdaǵy adam aǵzasynan ana jatyrynda jańa ómirdiń, ıaǵnı sábıdiń paıda bolý qubylysy da kórsetiledi eken. Bul proseske, ásirese áıel adamdar erekshe qyzyǵýshylyq tanytatyn kórinedi.

Al kishkentaı balalardy sekirip oınaýǵa bolatyn «adamnyń tili» qyzyqtyrady.

Murajaı gıdteri sapar barysynda adamdarǵa aǵzanyń ár qurylysyn, jumysyn tanystyrady. Adam aǵzasyna zıan kelgende ish qurylysynda qandaı proses oryn alatynyn da murajaıǵa kirip, bile alasyz.

Mýzeı jobasyn jasaýǵa 12 jyl ketipti, al qurylysy 2 jylǵa sozylǵan. Jalpy murajaı qurylysy úshin 30 mıllıon dollar jumsalǵan kórinedi. Ǵımarattyń ózi negizinen áınekten, al adam aǵzalary tot baspaıtyn bolattan jasalǵan. Ǵımarattyń uzyndyǵy – 35 metr. 

Daıyndaǵan: Gúlim Jaqan