Astanada kópbalaly analar memlekettiń qoldaýyna muqtaj. Búgin bir top elordalyq  kúmis, altyn alqa ıegerleri járdemaqy kóleminiń tym az ekenin aıtyp shaǵymdandy. Sol úshin ul-qyzdaryn úıde tastap, kúni-túni jumys isteıtin áıelder de baýyr eti balarynyń ómiri úshin alańdaýly. KTK arnasynyń tilshileri kópbalaly analardyń zaryn tyńdap qaıtty. 

Altyn alqa ıegeri Tájigúl Erkenshaeva 9 balanyń anasy. 5 ul, 4 qyzdy tárbıelep otyr. Bala-shaǵasymen qýyqtaı ǵana bólmede turatyn kelinshekke aı saıyn 16 myń teńge járdemaqy tólenedi. Biraq bul aqsha azyq-túlikten artylmaıdy deıdi ashynǵan ana. 

-Bir qap un, bir qap kartop, bir qap shekildeýiktiń maıyn alamyn boldy. Basqa eshteńe tımeıdi 16 myńǵa. Jeıtin tamaǵymyzǵa aqsha jetpeı otyr ǵoı. Sosyn páteraqymyz bar. Qaryzymyz bar. Nesıeni qashanǵy ala beremiz? - deıdi Tájigúl Erkenshaeva.

Nesıe alyp kún kórip júrgen batyr analar jeterlik. Barlyǵy kóp balaly januıaǵa beriler járdemaqy ósip, kórsetiler kómek artsa deıdi. Óıtkeni, 5-6 balany baýyryna basqan kelinshekter bir jaǵyna shyǵysyp, jumys isteıin desek múmkindik joq deıdi. Kishkentaı ul-qyzdardy jalǵyz qaldyra almaıdy.

-Bári biz úshin týdyń ba deıdi? Óz tirshiligińdi óziń jasa deıdi, - dedi kópbalaly ana.

Negizi kúmis pen altyn alqa ıegerlerine memleketten  10 myńnan 16 myń teńgege deıin járdemaqy tólenedi. Endi «januıa-2030» ortalyǵy kópbalaly analarǵa aqshalaı ǵana emes, páter alý jaǵynan da qoldaý kórsetilse deıdi. Óıtkeni, kóbi 5 balasynan aıyrylyp, qaıǵydan qan jutqan otbasy sekildi saraıda ómir súredi.

 -«Kóp balaly otbasy degen» baǵdarlama ashylýy kerek. Nege olardan alǵashqy jarna suraıdy? Ózderi páter jaldap júr. Bizde tirkelgen júzdegen ananyń barlyǵynda baspana joq. Arnaıy analar úshin arzan paıyzben alǵashqy tólemsiz úı berse, sol páter aqyny analardyń tóleıtinderine senim bildiremin, - «Januıa-2030» ana men balany qorǵaý ortalyǵynyń dırektory Jannur Sahıeva.

Al Eńbek jáne halyqty áleýmettik qorǵaý mınıstrligi kóp balaly áıelderge beriletin aqshanyń az ekenin áıteýir moıyndap, sharalardyń qarastyrylatynyn kesh te bolsa málimdegen edi. 

-Januıada 4 baladan kóp  bolsa, kópbalaly bolyp sanalady. Olarǵa beriletin áleýmettik kómektiń túri kóp. Bıyl mundaı otbasylarǵa búdjetten 365 mıllıard teńge bólingen. Biraq, qazir járdemaqyny taǵy ósirý týraly usynys jasadyq, - dedi keshe jýrnalıserdiń suraǵyna jaýap bergen Eńbek jáne halyqty áleýmettik qorǵaý vıse-mınıstri Svetlana Jaqypova.

Sondaı-aq, Eńbek jáne halyqty áleýmettik qorǵaý vıse-mınıstri, bala-shaǵasyn asyraý úshin túndeletip jumys isteıtin ata-analarǵa qatysty da málimdeme jasady. Aıtýynsha, bul olardyń óz tańdaýy eken. Qapyda 5 balasynan kóz jazyp qalǵan otbasy osy ýaqytqa deıin sheneýnikterden eshqandaı kómek suramapty. Al mınıstrliktiń kópbalaly otbasylarǵa járdemaqyny kóbeıtý jaıly usynysy ázirge sóz júzinde. Sondyqtan onyń naqty qanshaǵa ósetini  de beımálim.

Usynǵan: Gúlim Jaqan