Elbasynyń Konstıtýsıalyq Keńeske  Konstıtýsıanyń 42-babynyń 3-tarmaǵyna resmı túsindirme berý týraly ótinishine baılanysty Qazaqstan Prezıdenti janyndaǵy QSZI halyqaralyq zertteýler bóliminiń basshysy Ásel Nazarbetova áleýmettik jeli arqyly  halyqqa túsinikteme berdi dep jazady Qamshy.kz aqparat agenttigi. 

"4 aqpan kúni Qazaqstan Respýblıkasynyń Prezıdenti N.Nazarbaevtyń Konstıtýsıalyq keńeske QR Konstıtýsıasynyń 42-babynyń 3-tarmaǵyna resmı túsindirme berý týraly ótinishi jarıalandy. Osy derekke baılanysty qoǵamda, ásirese áleýmettik jelilerde túrli boljamdar men kertartpa áńgimeler oryn ala bastaýynyń aldyn alý úshin Elbasy halyqqa túsindirý málimdemesin jasady. Onda mundaı ótinishter, ıaǵnı týyndaǵan máseleler boıynsha Konstıtýsıalyq keńeske onyń qurylǵan merzimi 1995 jyldan beri 220 ret ótinish jasalǵany, onyń ishinde 20-ǵa jýyǵy Prezıdenttiń jeke ótinishimen bolǵany atap ótildi.

Konstıtýsıalyq keńes elimizdiń Ata zańynyń normalaryna resmı túsinik beretin organ bolǵandyqtan, qajettilik oryn alǵan jaǵdaıda Qazaqstan Konstıtýsıasyna sáıkes Prezıdent, Senat jáne Májilis tóraǵalary, Premer-mınıstr, Parlament depýtattarynyń jalpy sanynyń besten birinen kem emesi ótinish bildire alady.

Aıta keterligi, prezıdenttik respýblıkalar mysalynda osy tárizdes Konstıtýsıalyq keńeske ótinish bildirý qalypty jaǵdaı. Batys memleketterinde konstıtýsıalyq baqylaý organdary qurylǵan. AQSH-ta bul fýnksıany Joǵarǵy sot oryndaıdy, Fransıada – Konstıtýsıalyq keńes, Germanıada – Federaldyq konstıtýsıalyq sot, Ispanıada – Konstıtýsıalyq trıbýna jáne t.b. Al Konstıtýsıalyq baqylaý ınstıtýty mańyzdy demokratıalyq ınstıtýt bolyp tabylady. Onyń durys qyzmet jasaýy AtaZańnyń saqtalýyn jáne saıası turaqtylyqty qamtamasyz etedi, qoǵamdaǵy túrli toptardyń qarym-qatynasyn retteıdi. Atalǵan memleketterde Konstıtýsıa nemese zań normalaryna baılanysty másele týyndaǵan jaǵdaıda konstıtýsıalyq baqylaý organdaryna ótinish bildirý arqyly kez-kelgen másele boıynsha túsinik alý – saıası júıeniń kúndelikti qalypty jaǵdaıy retinde qabyldanady.

Basty nazarda ustaıtyn másele – Elbasy ótinishiniń astarynda tranzıt máselesi, ıaǵnı bılikti berý, bolmasa merziminen buryn prezıdenttik saılaý ótkizý turmaǵandyǵy. Qazirgi aqparattyq qoǵam jaǵdaıynda aǵymdaǵy máselelerge jan-jaqty taldaý jasaý arqyly qorytyndy shyǵarý bilimdilikti, saıası saýattylyqty talap etedi. Sol sebepti bolyp jatqan saıası úderisterge baıyppen qaraǵan abzal bolar edi", - dep jazady Ásel Nazarbetova.

Usynǵan: Ásel Bolatqyzy