Aýdan ákiminiń orynbasary Sáken Sultanhanov «Atameken» QR Ulttyq kásipkerler palatasy Maqtaaral aýdandyq fılıalynyń jańadan taǵaıyndalǵan dırektory Ábdirazaqova Nurgúl Perdebaıqyzyn palata ujymy men aýdan kásipkerlerine tanystyrdy dep jazady Qamshy.kz aqparat agenttigi Maqtaaral aýdany ákiminiń baspasóz qyzmetiniń deregin negizge alyp. 

Jańadan qurylǵan aýdanda kásipkerlerge jaǵdaı jasap, ony órkendetý eń basty mindet bolǵandyqtan, jańa dırektor bul jolda belsendi eńbek etý kerektigin aýdan ákiminiń orynbasary atap ótti.

«Kez kelgen aýdannyń, aımaqtyń, tipti tutas memlekettik ekonomıkalyq ál-aýqatyn kóteretin – ol kásipkerlik salasy. Jańadan qurylǵan aýdanda kásipkerlik salasyn damytý úshin aýdan ákimi B.Asanovtyń bastamasymen kóptegen saýda ortalyqtary men nysandar qurylǵaly otyr. Kásipkerlerge qoldaý kórsetip, olarǵa baǵyt-baǵdar berip otyrý – palatanyń basty mindeti bolǵandyqtan, bul jolda jańa basshy belsendi eńbek ete bilýi kerek. Sondyqtan, jańa bastaǵan qyzmetińiz jemisti bolsyn dep tileımin!» - dedi S.Sultanhanov.

N.Ábdirazaqova 1986 jyly Ózbekstan Respýblıkasynyń Gagarın qalasynda týylǵan. 2008 jyly Almaty qalasyndaǵy T.Rysqulova atyndaǵy Qazaq ekonomıkalyq ýnıversıtetin támamdaǵan.

Qazirgi qyzmetine taǵaıyndalǵanǵa deıin «Atameken» QR Ulttyq kásipkerler palatasy Maqtaaral aýdandyq fılıalynda menedjer-keńesshi qyzmetin atqarǵan.