Kevın Karter (1960-1994 jj.) – OAR-nyń fototilshisi, Pýlıtser syılyǵynyń laýreaty.
AQSH-ta jyl saıyn ádebıette, jýrnalısıka, mýzyka jáne teatr salalary boıynsha úzdik mamandar «Pýlıtser» syılyǵymen marapattalady. 90-jyldardyń basynda Ońtústik Afrıka Respýblıkasynyń jas fototilshisi Kevın Karter "Pýlıtser" syılyǵyn alý úshin sol kezderi jappaı ashtyq jaılaǵan Sýdan memleketine baryp, «taptyrmas» sýret túsirýdi oılaıdy.
1993 jyldyń basynda sol ólkelerge qaıyrymdylyq kómek saparymen barǵan BUU-nyń arnaıy tobymen birge Kevın Karter de Sýdanǵa keldi. Ashtyqtan japa shekken halyqqa azyq-túlik pen dári-dármek úlestirgen jerge aınaladaǵy birneshe shaqyrym qashyqtyqtan jergilikti turǵyndar shubyryp kele bastaıdy. Osy sátti paıdalanǵan Kevın de óńirdegi eldi-mekenderdi aralap, ashtyqtan qaljyraǵan adamdar men aıanyshty ómirdi sýretke túsire beredi.
Bir kúni jergilikti bir mekennen shyǵyp kele jatyp, kishkentaı balanyń álsiz, jylaǵan daýysyn estıdi. Jaqyndap qarasa, 6-7 jas shamasyndaǵy ashtyqtan qur súlderi qalǵan qyz bala jerge eńkeıip, basyn qolyna qoıyp, jylap jatyr eken. Onyń art jaǵynda kezekti qurbandyǵyn, ıaǵnı, balanyń ólgenin kútip, iri quzǵyn otyr!
Oıynda tek «Pýlıser» syılyǵyn áperetin sýret túsirsem degen maqsat qana bolǵan Kevın ońtaıly jerdi taýyp, osy sátti kadrdy shyrt etkizip fotoaparatyna túsirip aldy. Sóıtti de, kózdegen maqsatyna jetkenine qýanǵan ol eshteńe oılamastan álgi jerden qýanyshty kúıde ketip qalady.
Sýretti «Nú-Iork taıms» gazeti birden satyp alyp, jahanǵa jar salady!
Sóıtip, kóp ótpeı «Pýlıtser» syılyǵy baıqaýynda osy sýret úzdik shyǵyp, Kevın Karter ózi armandaǵan bas júldeni qanjyǵasyna baılaıdy!
«Meni bári quttyqtap jatyr, - dep jazdy ol ata-anasyna, - Sizderge alǵan syılyǵymdy kórsetýge asyqpyn. Bul meniń ómirimdegi eń úlken jetistigim!»...
Biraq... ıá, biraq, syılyq jeńimpazǵa tabystalyp, toı toılanyp, qýanysh saıabyrsyǵanda Kevındi «Men nege sol ashtyqtan álsiregen balaǵa kómektespedim? Onyń ómiri ne boldy eken? Tiri me, álde quzǵynǵa jem boldy ma?» degen oı mazalaı bastaıdy. Kevın óz oıymen arpalysyp júrgende, otqa maı quıǵandaı «Taım» jýrnaly «Ol nege balaǵa járdem bermedi? Artynda otyrǵan quzǵyn ne, fotograf ne? Ekeýi de jyrtqysh emes pe?» dep jazyp jiberdi. Ol maqalany oqyǵan Kevınniń ishki dúnıesinde alaı-dúleı quıyn bastalady. «Búldirshinge qalaısha qol ushyn sozbadym?» degen ókinishke toly oı qyr sońynan qalmady. Ózin qoıarǵa jer tappady...
Aqyry, dál sol marapat alǵan kúnnen úsh aı ótkende jan kúızelisi sharyqtaý shegine jetip, 33 jasar fotograf ózine qol jumsap tyndy... Óler aldynda qaldyrǵan hatynda: «Ashyqqan jáne jaraly balalardyń elesi qyr sońymnan qalmady. Men sharshadym...» dep jazyp ketti.
