Men eshkim emespin. Tek Adammyn. Allahtyń kórkem jaratylystarynyń ishindegi "aqyl ıeleriniń" birinen bolǵanyma myń shúkir. Jaratqanǵa sansyz madaq pen maqtaý bolsyn!

Men eshkim emespin. Tek bir ulttanmyn. Sonyń ishinde - Qazaqpyn. Maqtan tutamyn osy ulttyń ókili ekendigimdi! Ras, qazaq bolý - úlken baqyt!

Men eshkim emespin. Tek Pendemin. Ózgeler sekildi birde ókinip, ókindirip, saǵynyp, saǵyndyryp, jalynyp, jalyndyryp, muń syılap, muń jutyp, armandap, armandatyp, sezdirip, sezindirip... júretin kóptiń birimin ǵana...

Men eshkim emespin. Tek Kenjemin. Iá, beseýdiń besinshisimin. Alaıda erke emespin. Ákem men Anamnyń sút kenjesimin. Muny da maqtan etemin! Maǵan da artylǵan júk pen úmittiń salmaǵyn sezemin...

Men eshkim emespin. Tek Dospyn. Qalyń adamnyń ishindegi áldebir janyma jaqyn jandardyń dosymyn. Soǵan Shúkir. Dos bolý, dosy bolý, dosyń bolý da - baqyt bolsa kerek...

Men eshkim emespin. Tek Ustazbyn. Ózge qarasy kóp mamandyqtyń ishinde meni tańdaǵan, men tańdaǵan ol - ustazdyq. Myń shúkir. Kózim, ózim joq bolsam da, bul jalǵanda paıdasy bar izim qalsa, sol - baqyt.

Men eshkim emespin. Tek Qyzbyn. Uqqanǵa uǵynyńqy, túsingenge túsinikti, syılaǵandy syılaıtyn, júrekte oryn alǵan jandaryn jamandyqqa qımaıtyn, bardy baǵalar, myqty bolyp kóringisi keletin, alaıda, qyz bitkenniń bári sekildi jany názik, ókpeshil qyzbyn...

Men eshkim emespin.  Tek... tek  bireýdiń Baqytymyn... Baqytymnyń Baqytymyn... Buıyrǵan baq bar bolsa, soǵan laıyqtymyn... Bar bolmasa, bolǵany men úshin laıyqty...

Men eshkim emespin. Tek Joldasymnyń mańdaıyna jazǵan Jarymyn... taǵdyr jazsa, sońǵy dem úzilgenshe birge bolýǵa serttesken Serigimin... Teńimin... Qosaǵymyn...

Men eshkim emespin. Tek qaı jaqsylyǵym úshin ekeni beımálim, qushaǵyna eki balapan buıyrǵan Anamyn... Barynsha jaqsy Ana bolýǵa tyrysyp júrgen janmyn...

Men eshkim emespin. Tek bar bolǵany kóptiń biri - kelinmin. Qyzdaryndaı bola almasam da, ata-enege qyzmetine qabyldanǵan... barymdy salyp júrgen jaı ǵana kelinmin... 

Men eshkim emespin. Tek bar bolǵany bir túıir qanmyn, Allanyń nuryna shomylǵan...bir kúni táninen jany ajyrar... ózgelerdeı...

Maqpal Sembaı