Bul týraly «Nur Otan» partıasy Tóraǵasynyń Birinshi orynbasary partıa janynan qurylǵan Balalar quqyǵyn qorǵaý jónindegi respýblıkalyq keńestiń alǵashqy otyrysynda aıtty, dep jazady Qamshy.kz aqparat agenttigi.

– Keńes Elbasynyń tikeleı tapsyrmasymen qurylyp otyr. Jalpy bul másele birazdan beri kóterilip, osyǵan deıin daıyndyq jumystary júrgizilip kelgenin atap ótken jón. Basty maqsat – balalardyń quqyǵy men múddesin jan-jaqty qorǵap, olardyń qajettilikterin qamtamasyz etý. Osy baǵytta Úkimetpen, jergilikti atqarýshy organdarmen jáne úkimettik emes uıymdarmen birlesip jumys isteımiz. Bul iske jetekshi saıası kúsh retinde partıanyń barlyq áleýeti, ıaǵnı Májilis pen barlyq deńgeıdegi máslıhattardaǵy partıa fraksıalary, aımaqtyq jáne aýmaqtyq partıa fılıaldary jumyldyrylady. Ár fılıalda jaýapty adam bekitilip, Keńes jumysynyń júıeli túrde júrgizilýin qamtamasyz etedi, – dedi Máýlen Áshimbaev.

Sonymen qatar ol Keńestiń qyzmet aıasyn keńeıtý máselesine de nazar aýdardy.

– Balalar quqyǵyn qorǵaýmen birge Keńes qyzmetiniń aıasyn keńeıtip, kóp balaly otbasylarǵa qoldaý kórsetý, jumys isteıtin kóp balaly analarǵa laıyqty jaǵdaı jasaý sıaqty ózekti máselelerdi de qamtýdyń mańyzy zor. Osy baǵytta da tıimdi usynystar daıarlaýymyz kerek, – dedi partıa Tóraǵasynyń Birinshi orynbasary.

Óz kezeginde atalǵan Keńes tóraǵasynyń orynbasary, «Balalar quqyǵyn qorǵaý» qoǵamdyq qorynyń quryltaıshysy Dınara Zakıeva qazirgi tańda balalar quqyǵyn qorǵaý jumystary kóbine saldarmen kúres sıpatynda júrgizilip kele jatqanyn aıtty.

– Biz kóbine keleńsizdikterdiń saldarymen kúresip kelemiz. Sondyqtan Keńestiń jumysynda eń aldymen aldyn alý sharalaryna basymdyq berip, aldymyzǵa osy baǵytta keshendi is júrgizýdi basty mindet etip qoıyp otyrmyz. Osy rette jańadan qurylyp otyrǵan Keńestiń naqty jumys isteıtin organ bolatynyn erekshe atap ótkim keledi. Keńes elimizdiń barlyq óńirindegi «Nur Otan» partıasynyń fılıaldary janynan óz jumysyn bastap, ár balanyń qaýipsizdigi men jaıly ómirin qamtamasyz etýge úles qosady, – deıdi Dınara Zakıeva.

Jańa konsýltatıvtik-keńesshi organ quramyna Parlament Májilisiniń depýtattary, memlekettik organdar men úkimettik emes uıym ókilderi, salalyq sarapshylar jáne qoǵam qaıratkerleri múshe boldy. Keńes músheleriniń sheshimimen onyń tóraǵalyǵyna «Nur Otan» partıasy Tóraǵasynyń birinshi orynbasary Máýlen Áshimbaev saılandy.

Jıyn barysynda «Taiburyl» qoǵamdyq qory qamqorshylar keńesiniń tóraǵasy Murat Ábenov, «Ár bala otbasymen birge bolýy kerek» qoǵamdyq qozǵalysynyń jetekshisi Sholpan Baıbolova, «Best for Kids» qoǵamdyq qorynyń vıse-prezıdenti Emın Askerov, IýNISEF-tiń balalar quqyǵyn qorǵaý jónindegi baǵdarlamasynyń úılestirýshisi Tatána Aderhına jáne basqa da jıynǵa qatysýshylar sóz alyp, balalar quqyǵyn qorǵaý máselesine qatysty óz usynystaryn jetkizdi.

Jıyndy qorytyndylaǵan «Nur Otan» partıasy Tóraǵasynyń Birinshi orynbasary Máýlen Áshimbaev elimizdiń jarqyn bolashaǵy úshin bul istiń mańyzy zor ekenin aıtyp, barlyq múddeli taraptardy birlesip jumys isteýge shaqyrdy.