Perishteler úıimizde de júre me?

Perishteler – nurdan jaratylǵan, salmaǵy men pishini bolmaıdy. Olar tynyshtyq pen mahabbat ornaǵan otbasylardyń turaqty qonaǵy. Perishtelerge sený – ımannyń bir tiregi bolyp tabylady. Olar týraly biz ne bilemiz?

Alla taǵala ardaqty Paıǵambarymyz (s.ǵ.s.) arqyly Jábireıil (ǵ.s.), Mıkaıl (ǵ.s.), Israfıl (ǵ.s.) men Ázireıil (ǵ.s.) degen úlken tórt perishtelerden bólek, basqa da myńdaǵan perishteler bar ekenin jetkizgen.

Ár adamda eki perishte bolady. Biri izgi amaldarymyzdy jazyp otyrsa, ekinshisi kúnálarymyzdy jazady. Osy jazylǵandar negizinde Jaratýshymyz qıamet kúni úkim shyǵarady. (Anyǵyn Alla biledi).

Bizdi baqylap júretin basqa da perishteler bar. Mysaly, bala jatyrda jatqanda balanyń jynysyn, taǵdyry men ólim ýaqytyn jazady. Allanyń ámirimen olar bizdi baqylap, qorǵaıdy. Olar únemi bizben birge: tynyshtyqta, namaz oqyǵanda, jaqsy ister istegende...

Jel men bulttardy da qadaǵalap, olardy qajetti jaqtarǵa baǵyttaıdy. Tipti, árbir jańbyrdyń tamshysy perishtelerdiń qadaǵalaýymen jaýady. Olar alapat kúshke ıe. Biraq barlyq is-áreketterin Allanyń buıryǵymen ǵana oryndaıdy.

Allanyń aty atalǵan jerge jınalatyn perishteler bar, ol adamdarǵa Alla óziniń meıirimin tógip, bereke beredi. Zikirlerimiz ben salaýattarymyzdy jetkizýshiler de solar.

Qaıda júrsek te, jumysta, úıde, alys saparǵa shyqsaq ta serigimiz bolady. Uıyqtap jatqanymyzda uıqymyzdy qorıdy. Alaıda biz olardy kóre almaımyz. Úıimizge perishtelerdiń kóp kelip, bizdi qorǵap júrýleri úshin ne isteýimiz kerek?

Allanyń bul keremet jaratylystary mahabbat, syılastyq, meıirimdilik pen tazalyq bar úıde ómir súredi. Biraq, urys-keris, ashý, qataldyq pen meıirimsizdik ornaǵan úıde turaqtamaıdy. Ózimen birge bereke men nesibeni alyp ketedi. Mundaı úı rýhanı jaǵynan artta qalyp, turǵyndary baqytsyz bolady.

Úıden shyǵyp bara jatyp biz úıdiń ár buryshyn muqıat tekseremiz. Sol kezde perishtelerdiń de úıimizde qalatynyn este saqtaıtyn bolsaq, barar jerimizge alańsyz, úıdi ýaıymdamaı baryp kelemiz. Iaǵnı,úıimizdi Allanyń qorǵaýynda qaldyramyz.

Úıge kirerde Allanyń atyn atap, úıdegi perishtelermen sálemdesken durys. Paıǵambarymyz (s.ǵ.s.) solaı istegen, tipti adamdar turmaıtyn bos úıge kirgende de, sebebi onda perishteler ómir súredi.

Perishtelermen birge ómir súrý – otbasynyń jylýlyǵyn saqtap, berekede, birlikte, baqytty ómir súrý, shynaıy duǵalarmen ımandy kúsheıtip, Allaǵa shúkirshilik etý degen sóz.

Jalǵyz qalǵanymyzda da janymyzda eń keremet jaratylys – perishtelerdiń bar ekenin umytpaǵanymyz jón. Biz árdaıym búkil álemniń Rabbysy – Alla men perishtelerdiń nazaryndamyz…

Yesbergen Alaukhanovtyń feısbýk paraqshasynan