Parlament Májilisiniń depýtaty, «Aq jol» partıasynyń tóraǵasy Azat Perýashev Qostanaı óńirine sapary aıasynda «Qazaq tulpary» jylqy zaýytyna baryp, seriktestik basshylyǵymen kezdesti, dep jazady Qamshy.kz aqparat agenttigi.

«Qazaq tulpary» JSHS-nyń dırektory Dıas Qońyrshın atqarylǵan jumystar jóninde aıtyp, aldaǵy josparlarymen bólisti. Onyń aıtýynsha, kásiporyn Qostanaı tuqymyn damytyp, ári qaraı jetildirý úshin ınvestorlar tapqan eken, endi Aýyl sharýashylyǵy mınıstrligi aqshalaı qarajat bólý joldaryn qarastyrýda.

«Qazaq tulpary» JSHS jumysymen tanysqan Azat Perýashevqa mekeme basshysy birqatar máseleler men kedergiler týraly aıtty.

– Buǵan deıin barlyq jaǵdaı jasalyp kelgen edi. Qarjylaı kómek te kórsetilgen. Ókinishke oraı, onyń barlyǵy toqtady. Nege? Ol jaǵyna toqtalǵym kelmeıdi. Aýyl sharýashylyq salasynda durys jumys jasalmaǵan. Biraq, áleýet bar bizde. Qazirgi ýaqytta baǵdarlama boıynsha 3 asyl tuqymdy jylqyny satyp almaqpyz,  – dedi mekeme basshysy.

Májilis depýtaty óz kezeginde qazaq jylqysyna tek soǵym retinde ǵana qaramaý kerektigin tilge tıek etti.

— Qostanaı jylqysy joıylý aldynda tur. Nebáry 20 mln teńgege asyl tuqymdy jylqylardy qalaı ósirýge bolady? «Qazaq tulpary» – bizdiń brend. Ózge elderde osy baǵytta jumys isteıtin bildeı bir mınıstrlikter bar. Bizde qostanaı jylqysyn saqtap qalýmen aınalysyp otyrǵan sizder ǵana, – dedi Perýashev.

Usynǵan: Nazerke Labıhan