16 mınıstrlik jumys istep turǵan Qazaqstan Respýblıkasynda taǵy bir, ıaǵnı 17-shi mınıstrlikti ashý usynyldy, dep habarlaıdy Qamshy.kz aqparat agenttigi.

Usynǵan – Senattyń halyqaralyq qatynastar, qorǵanys jáne qaýipsizdik komıtetiniń tóraǵasy Darıǵa Nazarbaeva. Ataýy – Saýda mınıstrligi.

Sebebi, Nazarbaevanyń aıtýynsha, elimizde túıini sheshilmeı turǵan máselelerdiń biri – saýda salasy eken.

«Bizde saýda salasynda qıyndyqtar kóp, ony retteýdi qadaǵalaı almaı otyrmyz, ákimshilikpen de másele jeterlik.  2018 jyldyń birinshi toqsanynda eldiń kólik jáne logıstıka sektoryndaǵy JİÓ 8,2% -dy qurady, biz Kólik jáne ınfraqurylym mınıstrligin qurdyq.  2018 jyldyń birinshi toqsanynda elimizdiń kóterme jáne bólshek saýda úlesi jaǵynan JİÓ shamamen 15% qurady. Biraq áli Saýda mınıstrligi joq», - dedi Darıǵa Nazarbaeva.

Nazarbaevanyń sózinshe, Qazaqstan – Eýrazıa kontınentindegi eń iri tranzıttik, kólik-logıstıkalyq ortalyq. Sol sebepti saýda máselesin de joǵary damytyp alýǵa ábden múmkin. Al eldegi saýda isterimen aınalysyp otyrǵan saýda departamenti ishki jáne syrtqy saýdaǵa áser etetin quraldardyń joqtyǵyn aıtyp «shaǵymdanypty». Muny eskergen Darıǵa Nazarbaeva «saýda úlesi jaǵynan JİÓ joǵary paıyzdy quraıtyn elde nege áli saýda mınıstrligi joq?" degen suraqty qoıa saldy. Suraqqa jaýaptyń qandaı bolatynyn bolashaqta birge kóremiz. 

Usynǵan: Gúlim Jaqan