Aqpannyń 6-sy kúngi Astanada analar jıylyp, bılikke qoıatyn talaptaryn jarıa etti. Olar "Astana" konsert zalynda jınaldy. Jıyn áýelde konsert zalynda kezdesý túrinde bastalǵan. Alaıda jınalǵandar bılik ókilderine óz máselelerin jetkizý úshin birinen soń biri sahnaǵa shyǵyp, sóıledi.
Jınalǵan adamdar kezek-kezegimen óz talaptaryn bildirgen. Olardyń keıbiri ózderin kóp balaly ana retinde tanystyrǵan. Arasynda ózderin "Altyn alqa", "Kúmis alqa" ıesi ekenin aıtqandar bar. Shyǵyp sóılegenderdiń keıbiri múgedek balalary bar ekenin aıtqan.
Kóp balaly analardyń máselesi Astanada bes bala órtten qaza tapqan oqıǵadan keıin qozǵalyp otyr.
Almatyda da analar óz máselesin kóterip qala ákimdigine barǵan. Ákimdik ǵımaratyna kelgen birneshe adamdy sheneýnikter ishke kirgizgenimen jýrnalıserdiń kirýine ruqsat etpegen.
Belgili bolǵandaı, sheneýnikter ishke kirgizip alǵandardyń arasynda buǵan deıin Astanada bes balanyń ajalyna sebep bolǵan jeke úıdegi órtten keıin áleýmettik jelide ana men balany qorǵaý týraly aksıa ótkizý týraly bastama kótergen belsendiler de bolǵan.
Analar Shymkent qalasy ákimdigine de barǵanymen, ákimdik ruqsat etse de ishke kirmeı jarty saǵattaı syrtta turyp tarap ketken. Munda qala ákimdigin polıseıler kúzetip turdy. Alaıda bul sharanyń qandaı maqsatta júrgizilip jatqany aıtylmady.
4 aqpanǵa qaraǵan túni Astananyń Kóktal-1 shaǵyn aýdanynda jeke úıdiń aýlasyndaǵy ýaqytsha baspana órtenip, bir otbasyndaǵy 2006, 2008, 2013, 2015 jáne 2018 jyly týǵan bes qyz bala opat bolǵan. Qaza bolǵan balalar 5 aqpanda jerlendi. Jergilikti bıliktiń dereginshe, órt balalardyń ata-anasy jumysqa ketken kezde bolǵan. Otbasy kópbalaly shańyraq retinde tirkeýde turǵan.
Qazaqstannyń ár aımaǵynda bolǵan kóp balaly analar shaǵymynan soń Úkimette arnaıy jumys toby, keıbir oblystarda komısıalar qurylǵany habarlandy.
AzattyqLIVE habarynda «Kóp balaly analardyń talaby qandaı? Bul bastamany kóterýshilerdiń maqsaty ne? Máselelerdi sheshý úshin bılik ne istep otyr?» degen suraqtar talqylandy. Habar qonaqtary - bılik ókilderimen kelissóz jasap júrgen belsendiler Sáýle Ábildahanqyzy men kóp balaly ana Aqmaral Basırova.
Usynǵan: Nazerke Labıhan
