Búgin Qazaqstannyń  №1 ledıi, hanymy, "BÓBEK" qorynyń Prezıdenti Sara Alpysqyzy 78 jasqa toldy dep jazady Qamshy.kz aqparat agenttigi. Bul týraly Janar Baısemizova óziniń feısbýk paraqshasyna jazdy. 

Ol táýelsizdikten keıin, elge eń alǵash ózin-ózi taný ilimin ákeldi. Mahabbat, meıirimdilik, izgilikke toly adamgershilik qasıetterdi nasıhattady. Adam ózgeni taný úshin aldymen ózin-ózi tanyp, bilýi qajet ekenin aıtty. 

Negizi,shyntýaıtyna kelsek, Sara Alpysqyzy qazaq halqyna óte qajet dúnıeni dáriptedi. Biraq dál sol kezeńde onyń ilimin basqalar naýqanshylyqqa aınaldyryp jiberdi. Halyq sondaı tereń, rýhanı ilimdi alýǵa daıyn bolmady. 70 jyl Qudaıdan alshaqtatqan Keńestik júıe qazaqtardyń boıyndaǵy ımanı qasıetterdi joıyp jibergen edi. Qaıta túleýge kóp ýaqyt ketti. 

Sara Alpysqyzyn sońǵy ret IýSA telearnasynda jýrnalıs bolyp júrgende kórdim. Ol kezde meniń boıymda jastyq maksımalızm janyp turǵan kez edi. Bizdiń birinshi tapsyrmamyz synaý, prolema izdeý bolatyn. Ózimizshe ádildik izdep, halyqqa jaq bolatyn taqyryptar kóterip júrmiz, bılikti synap júrmiz dep máz edik. Sol kezdegi bizdiń pozısıamyz, ózimizdiki emes bóten kózqarastardyń kórinisi bolǵanyn qazir túsinemin. 

"Bóbek" qorynyń jınalysyna barǵanda osy júıedegi jumysty synap, birinshi hanymnyń qaǵıdalary qazaqqa jat ekenin jata kep soǵyp, sújet berdim. Ózim bir keremet erlik istegendeı masattandym. 

Biraq ýaqyt óte kele men qateleskenimdi, qaıyrymdylyqqa, ózin-ózi tanýǵa, rýhanı jańǵyrýǵa qarsy turǵanymdy uǵyndym. Arada kóp jyl ótken soń, bir kúni kóz aldyma ózinen ózi Sara Alpysqyzynyń sol jıyndaǵy beınesi kele qaldy. 

Zalǵa ádemilep kirgen birinshi hanym, ózine sóz berilgende basyn kóterip, jan-jaǵyna súıispenshilikpen qarap: "DAVAITE PO FILOSOFSTVÝEM", - dedi jumsaq únimen. Men jap-jas qyz, bir sát ańtarylyp qaldym...
"Qalaı? Qalaı po fılosofstvýem..." dedim, ishteı kúbirlep... 

Sol shaqtarda Sara Alpysqyzynyń halqyna jaryq sáýle taratqysy kelgenin, ózine ashylǵan ilimdi bóliskisi kelgenin keıin uqtym. 
Osylaısha, maǵan birneshe jyldan keıin ozarenıe keldi. 

Men Sizden keshirim suraımyn, Sara Alpysqyzy. 
Men Sizdi jaqsy kóremin, Sara Alpysqyzy. 
Ómirińiz uzaq bolsyn! 
Ózin ózi taný bizge qajet! 
Siz ekken dán, endi shyǵyp jatyr! 

Usynǵan: Maqpal Sembaı