QR Prezıdenti Nursultan Nazarbaev «100 jańa esim» jobasynyń ekinshi kezeńine ótken azamattarmen kezdesti. Olardyń ishinde 29 jastaǵy Erjan Sálimgereev te bar, dep xabarlaıdy Qamshy.kz aqparat agenttigi QazAqparattyń deregin negizge alyp.
«Úshinshi synypta oqyp júrgende transformatordyń ishine kirip, toqqa túsip qaldym. Sol kezde bir qol jáne bir aıaǵymnan aıyryldym. Aýrýxanadan úıge alyp kelgesin muǵalimder úıde oqytatyn boldy. Artynan dopty úırendim. Aýada ushyp bara jatqan dopty taıaqpen tireı qoıamyn. Basqa jigitterdi aldap ketemin. Olar namystanyp, meniń taıaǵymdy bir teýip, syndyryp tastaıdy. Sonyń bári aýyr tıdi maǵan. Mektepti bitirgennen keıin balalar arsynda «Men Almatyǵa baramyn, men Astanaǵa oqýǵa túsemin» degen áńgimeler júredi. «Men qaıda baramyn?» degen oı týyndady. Úıdegi jaǵdaıdy bilemin. Sonda tańqalatynym, bir baseınniń qasynda eki jyl boıy taksı júrgizdim. Biraq ómiri sonyń ishine kirmeppin. Artynan júzýdi úırendim», - dedi E.Sálimgereev.
Búginde Erjan xalyqaralyq dárejedegi sport sheberi, Álem kýbogynyń tórt dúrkin ıegeri, Azıa oıyndarynyń eki márte jeńimpazy.
«Sport meniń ómirimdi túbegeıli ózgertti. Qaısar minezimniń arqasynda eshqandaı qıynshylyqtarǵa qaramaı, aldyma maqsat qoıyp, kúnde jattyqtym. Búginde úlken jetistikterge jetip otyrmyn. Indonezıa eli Jakarta qalasyna ótken jazǵy Paraazıa oıyndarynda qos altyn medal enshiledim. 50 metrdi 31 sekýndta baǵyndyrsam, 100 metrdi 1 mınýt 8 sekýndta baǵyndyrdym. Bul — meniń jeke rekordym. Endigi maqsatym — Tokıo Olımpıadasynda chempıon ataný», - dep atap kórsetti E.Sálimgereev.
Usynǵan: Ásel Bolatqyzy
