Almaty qalalyq Áleýmettik ál-aýqat basqarmasynda kópbalaly analardyń qatysýymen kezekti ret basqosý ótti, dep habarlaıdy Almaty.tv tilshisi.
Buǵan deıin Memleket basshysynyń tapsyrmasy boıynsha úkimettik, óńirlik deńgeıde kópbalaly otbasylarǵa júıeli qoldaý sharalaryn qolǵa alý jónindegi jumys toptary qurylǵan bolatyn. Analarmen kezdesý qaladaǵy barlyq aýdanda ótti. Sonyń negizinde qatysýshylardyń usynys-tilekteri jiti taldanyp, nátıjesinde, 13 aqpan kúni «Nur Otan» partıasy fılıalynyń kezekten tys konferensıasynda Almaty qalasynyń ákimi Baýyrjan Baıbek kópbalaly analardy qoldaý týraly aýqymdy sharalardy aıqyndady.
Qala basshysy jarıalaǵan bastamaǵa saı, Almatyda kópbalaly analarǵa arnalyp «Baqytty otbasy» ortalyǵy ashylady. Ortalyq kópbalaly otbasylar múddesine jumys isteıdi. Ortalyq bir tereze qaǵıdasy boıynsha jumys istep, turmysy tómen januıalarǵa keshendi kómek kórsetýdi kózdeıdi. Onyń ishinde, quqyqtyq jáne psıhologıalyq keńes te beriledi. Sondaı-aq, múmkindigi shekteýli jandardy qaıta saýyqtyrýǵa kómek kórsetiledi. Tipti, atalǵan ortalyqqa kópbalaly analardyń jumysqa turýyna da jaǵdaı jasalmaq.
Sonymen qatar, turǵyn úı kezeginde turǵan kópbalaly analarǵa alǵashqy jarnaǵa jergilikti búdjetten sýbsıdıa tólenedi. Bul tórt jáne odan da kóp kámelet jasyna tolmaǵan balalary barlarǵa qatysty. Komýnaldyq qyzmet, ıaǵnı ystyq jáne sýyq sý esepteıtin jeke esepteýish quraldaryn ornatý boıynsha ótemaqy kólemi de ulǵaıtylady. Múmkindigi shekteýli balalardy úıde oqytý jáne bir rettik áleýmettik kómek kólemi de artady. Almaty bıligi kópbalaly jáne áleýmettik jaǵdaıy tómen otbasylarǵa ekinshi baladan bastap balabaqsha shyǵynyn da óteýdi josparlap otyr. Usynylǵan júıeli shara arasynda kópbalaly otbasylarǵa jáne qysqa merzimdik tegin kýrs stıpendıasyn uıymdastyrý bar.
«Meniń oıymsha, jıynda aıtylǵan kópbalaly otbasylarǵa kórsetiletin qoldaý men kómek júzege asyrylady. Bul analar qoıǵan barlyq suraqtarǵa baılanysty. Biz turǵyn úı, járdemaqy turǵysynda baısaldy túrde sóılestik», – dedi kópbalaly ana Nurgúl BAISADYQOVA.
«Almaty ákimdigi barlyq máselelerdi ashyq túrde talqylap jatyr. Ol máseleler kópbalaly, áleýmettik jaǵdaıy tómen otbasylarǵa qatysty bolyp otyr. Bizdi Almaty qalasy ákiminiń orynbasary Erlan Áýkenov muqıat tyńdady», – dep pikir bildirdi kópbalaly ana Uljalǵas SATQYMBEKOVA.
Óz kezeginde, bastamashyl top ókili Sáýle Ábedınova ashyq dıalogqa shaqyrdy. Onyń sózinshe, esh baıbalamsyz, aqylǵa júginý kerek.
«Almaty kópbalaly, áleýmettik jaǵdaıy tómen otbasylardyń usynystaryna shuǵyl túrde nazar aýdardy. Jumys toby quryldy. Onyń quramynda qalanyń ár aýdanynan qoǵam belsendileri kirdi. Bul ashyq dıalogtyń oń áseri», – dep atap ótti kezekti ótken jıyndy qorytyndalaǵan qoǵam belsendisi Sáýle ÁBEDINOVA.
