Qazaqstannyń Eńbek jáne áleýmettik qorǵaý mınıstri Mádına Ábilqasymova bılik «kóp balaly otbasylardyń nege muqtaj ekenin áli anyqtap jatyr» dep habarlady. Mınıstrdiń sózinshe, qazir árbir eldimekende qansha kóp balaly otbasy bar ekeni anyqtalǵan dep jazady Qamshy.kz aqparat agenttigi Azattyqtyń deregin negizge alyp.
— Árbir otbasynyń nege muqtaj ekenin bilip baryp kómektesý kerek – birinde densaýlyq máselesi, biri baspanaǵa zárý, bilim berý men qarjylyq qıyndyqtary bar otbasylar bar, - dedi Ábilqasymova.
Mınıstr «kóterilgen máseleniń kóbi oń sheshim tabady» degenimen, úkimet kóp balaly otbasylarǵa beriletin áleýmettik kómekke qarastyrylǵan qarjynyń qanshaǵa ósetinin aıtqan joq. Ábilqasymova «bólinetin qarajat Qarjy mınıstrliginiń esepteýinen soń jarıalanady» dedi.
— Turmysy tómen kóp balaly jáne az qamtylǵan otbasylar basty nazarda bolady. Tabys deńgeıi jaqsy bolýy úshin [kóp balaly otbasylarǵa] ájepteýir qarjylaı kómek kórsetiledi dep oılaımyn, - dedi mınıstr.
Usynǵan: Ásel Bolatqyzy
Pikir qaldyrý