Aqtaýdaǵy «Aınalaıyn» jekemenshik balabaqshasynyń dırektory tárbıeshilerdiń birin soqqyǵa jyqqany úshin jaýapqa tartyldy. Bul týraly Qamshy.kz aqparat agenttigi Lada.kz basylymyna silteme jasap habarlaıdy.

Aqtaý qalasynyń mamandandyrylǵan ákimshilik sotynda mekeme basshysy Gúljanat Muratbaıǵa qatysty ákimshilik is qaraldy.

«Sottyń anyqtaýynsha, 14 aqpan kúni saǵat 17:00-de «Aınalaıyn» balabaqshasynyń dırektory tárbıeshiniń kómekshisi Ý.-men sózge kelisip qalyp, ydyspen basynan uryp jibergen. Solaısha, densaýlyǵyna jeńil zardap keltirgen. Dırektordyń kinási medısınalyq saraptamanyń qorytyndysymen jáne oqıǵa kýágerleriniń sózderimen dáleldendi», - delingen sottyń habarlamasynda.

♦Aqtaýda balabaqsha dırektory tárbıeshini qanjosa etip sabap tastady

QR Ákimshilik quqyq buzýshylyq týraly kodeksiniń 73-1-babynyń («Densaýlyqqa qasaqana jeńil zıan keltirý») 1-tarmaǵyna («Densaýlyqtyń qysqa merzimge buzylýyna nemese jalpy eńbek qabiletin turaqty túrde bolmashy joǵaltýǵa ákep soqqan, densaýlyqqa qasaqana jeńil zıan keltirý») sáıkes, sottyń sheshimimen balabaqsha dırektoryna 37 875 teńge kóleminde aıyppul salyndy.

Sot qaýlysy zańdy kúshine engen joq. 

Usynǵan: Gúlim Jaqan