Qystyń kózi qyraýda Aqtóbelik kópbalaly otbasy dalada qaldy. Turǵan úıleri órtenip, qyzyl jalynda qalǵan tıtteı úsh balany aǵaıyny qutqarǵan. Abyroı bolǵanda bári din aman. Tek balaly-shaǵaly otbasynyń barar jeri bolmaı tur. Aıtyp kelmeıtin apattan zardap shekken Baıtóbetovterdiń jaǵdaıy týraly Qamshy.kz aqparat agenttigi Eýrazıa birinshi arnasyna silteme jasap habarlaıdy.

Qyzyl jalyn mine, balalardyń oıyn bólmeden shyqqan. Órt shyqqanda úıde qalǵan úsh bala kórshi bólmede teledıdar qarap otyrypty. Abyroı bolǵanda olardy qojaıynnyń aǵaıyny qyzyl jalynnan aman alyp qalǵan.

Murat pen Aınur alty balasymen týystarynyń úıine túnep shyqqan. Órtten ortasyna túsken baspanasyna qarap ekeýi qosyla egilip júr. Byltyr jazda ǵana jańalap, jóndep alǵan eken. Eń bastysy, bala-shaǵasynyń aman qalǵanyna shúkir deıdi erli-zaıyptylar. 

«Baratyn jerimiz joq. Bireýdiń úıinde qashanǵy turamyz? Apasynyń úıine qondyq keshe. 1-2 kún turarmyz, balalardyń sabaǵy qaldy jaıyna. Bulardyń kitaby da, kıimi de joq. Ústerindegi kıimdi surap-surap áreń degende kıindirip ákeldim», - deıdi turǵyn Aınur Baıtóbetova.

Órt tutanǵanda úıde eresekterden eshkim bolmaǵan. Aınur 11 jastaǵy qyzy men 3 aılyq sábıin dárigerge kórsetýge emhanaǵa ketken. Al otaǵasy jumysta bolypty. Kózdi ashyp-jumǵansha sýyq habar jetken. Úıde qalǵan qyzy men eki uldy qaınysy qutqarǵan. Al bir balasy sabaqta bolypty. Úıdiń tuńǵyshy kúlge aınalǵan bólmesin kórip, áli óz-ózine kele alar emes.

ÁSEMAI BOLAT:

«Kitaptarymnyń bári órtenip ketken, kıetin kıimderim de joq endi. Osy kitap, kıimderdi alýǵa kómektesse dep suraımyn. Úıimdi remonttap berse, ózimniń bólmemdi remonttap berse eken...».

Ákimdiktegiler kóp balaly otbasynyń jaǵdaıynan habardar. Úıdiń qojaıyny órt qaýipsizdigin saqtamaǵan dep otyr. Mundaı jaǵdaılarda jergilikti búdjetten qarjy qarastyrylmaǵanyn túsindirdi. Degenmen, dalada qaldyrmaı, kómek kórsetemiz dedi. Ári bir rettik kómek beriledi eken. 

«Qoldanystaǵy zańdarǵa sáıkes búdjet tarapynan kómek buǵan ótep berý nemese úı salyp berý ondaı qarastyrylmaǵan. Qazir endi ol adamdardy dalaǵa tastamaýdyń amaly, múmkindiginshe qys kezinde eń bastysy páter, ýaqytsha pátermen kómektesý máselesin qarastyryp jatyrmyz», - deıdi qalalyq azamattyq qorǵanys jáne tótenshe jaǵdaılar bóliminiń basshysy.

Baıtóbetovterdiń balalary oqıtyn mekteptiń basshylyǵy da otbasyna qol ushyn sozýǵa daıyn. Oqý quraldaryn berip, kıim-keshekterin bútindeımiz dep otyr. Al kóp balaly otbasynyń búlingen úıimizdi jóndeýge kómek bolsa eken degen tilekteri bar.

Usynǵan: Nazerke Labıhan