HH ǵasyrdyń 60-70 jyldary Tımýr Segizbaev, Seıilda Baıshaqov, Quralbek Ordabaevtaı fýtbol sańlaqtaryn  Keńes Odaǵynyń aıtýly mamandary men mıllıondaǵan jankúıerleri moıyndaǵany belgili. Táýelsizdik alǵan 27 jylda qazaqtan Eýropany aıtpaǵanda, Azıany tamsandyrǵan bir qazaq fýtbolshysynyń shyqpaǵany bul salanyń kóshi túzelmeı turǵanyna aıqyn dálel.  Bizdiń sport  fýnksıonerleri shırek ǵasyrda  respýblıka fýtbolynyń tıimdi damý júıesin qalyptastyra almady. Syrttan legıoner shaqyrýmen qazaq fýtbolynyń kósegesi kógermeıtini áýelden belgili edi. Biz shırek ǵasyrda ózimizdiń ulttyq kadrlarymyzdy daıarlaı almadyq. Shetten bapker shaqyrýmen memlekettiń mıllıondaǵan qarjysyn jelge ushyrdyq. Sol «qonaqtar» qazaq fýtbolyna qandaı paıdaly júıe qaldyrdy, degen saýalǵa dál qazir eshkim jarytyp jaýap bere almaıdy.

Bizdiń fýtbol osy salany tereń bilmeıtin pysyqtardyń aınalshyqtap júretin «qazandyǵyna» aınaldy. Sonyń saldarynan qazaqtyń fýtbol sharýashylyǵyn aıaǵynan tik kóterýge qabiletti nebir azamattar solardyń tasasynda qalyp jatyr.

Iá, ulttyq quramasy qaýqarsyz qazaq eliniń  eki balasy qazir Eýropada dop teýip júr.

19 jastaǵy Erkebulan Seıdahmet Reseıdiń «Ýfa» klýbynyń shabýylshysy. 2017 jyly Erkebulandy Peterbordyń «Zenıti» shaqyrǵan bolatyn. Biraq FIFA-nyń erejesine oraı «Zenıt» jasy  18-ge tolmaǵan bozbalany quramyna qosa almady. Erkebulan Qazaqstannyń jasóspirimder, jastar quramalarynda ózin jaqsy qyrynan tanytyp, byltyr ulttyq qurama sapynda Vengrıaǵa qarsy oıynda alańǵa shyqty. Bul oıynda bizdiń bala gol soqty. Odan keıin Andorra qaqpasyna dop engizip, qalyń tileýlesterin dý etkizip edi. Uzamaı Latvıamen básekede qatty jaraqat alyp, saptan shyǵyp qaldy.

Jambyl fýtbol mektebiniń túlegi Erkebulan Seıdahmettiń endigi maqsaty – Reseı mamandaryn moıyndatyp, ári qaraı Eýropa asý.

19 jastaǵy Dinmuhammed Káshken bolsa, qazir Ispanıanyń «Kasablanka» klýbynyń jastar komandasynda oınap júr. Dinmuhammed Qazaqstan jastar quramasynyń kapıtany boldy. Madrıdtiń «Atletıko» klýbynyń akademıasynan tálim alǵan talapker. Fýtbol oıyny erekshe damyǵan Ispanıa mamandarynyń nazaryn aýdarǵan Dinmuhammed balamyz osy betinen tanbasa, alash jurtynyń aıaqdoptaǵy maqtanyshyna aınalady, degen úmitimiz bar.

Qazaq balýandary men boksshylary, bularǵa qosa Áljandaı basketbolshymyz, Jánibek Saýranbaevtaı voleıbolshymyz, Ámın Tuıaqovtaı jelaıaǵymyz, Marat Satybaldıevteı velojúırigimiz Eýropadan asyp, álem jankúıerlerin san márte moıyndatty emes pe! Endeshe, endigi kezek Erkebulan men Dinmuhammed sekildi ala dop qýǵan baýyrlardiki.

Qydyrbek Rysbek