Tájikstan azamatyna ǵashyq bolǵan boıjetken 16 jasynda mektepti bitire salyp, Dýshanbege jigitimen birge qashyp ketken, dep jazady Qamshy.kz aqparat agenttigi sputniknews.kz saıtynyń deregine súıenip.

Qazaqstannyń Syrtqy ister mınıstrligi qyzmetkerleri 19 jyl buryn izim-ǵaıym joǵalǵan qazaqstandyq qyzdy Tájikstan astanasynan izdep tapty. Bul týraly vedomstvonyń resmı ókili Aıbek Smadıarov brıfıń kezinde habarlady.

Qańtar aıynyń basynda Syrtqy ister mınıstri mindetin atqarýshy Beıbit Atamqulovqa Atyraý qalasynyń depýtaty ótinish jazǵan. Ol bir áıeldiń 19 jyl buryn joǵalyp ketken qyzyn áli kúnge deıin izdep júrgenin aıtypty. Sol kezde 16 jastaǵy qyz Tájikstan azamatyna ǵashyq bolyp, mektepti bitire salysymen jigitimen birge Dýshanbege ketip qalady.

"Bizdiń elshilik aýqymdy jumys atqardy. Qolymyzda 19 jyl burynǵy sýret pen Ásel degen esim ǵana bar edi. Ony bir aı buryn Dýshanbedegi dıplomattarymyz izdep tapty", - dep habarlady syrtqy saıasat vedomstvosynyń ókili.

Tájikstandaǵy konsýl kólikpen ketip bara jatyp, jol shetinde izdestirilip jatqan qazaqstandyqqa uqsas áıeldi kórip qalady. Ol qazaq tilin bilmese de, orys tilinde esimi Ásel ekenin aıtqan.

"Konsýl týystarynyń sýreti men vıdeosyn kórsetkende, ol jarty saǵat kóz jasyn tyıa almaı jylap, qatty eseńgirep qaldy. Óz-ózine kele almaı qoıdy. Biz ony elshilikke alyp kelip, qaıtar bıletine aqsha jınap, Qazaqstanǵa oralý úshin kýálik berdik. Sóıtip, ol ótken jumada Dýshanbe - Almaty - Atyraý baǵdarymen ushyp keldi, qazir týystarynyń qasynda", - dedi Aıbek Smadıarov.

Osy ýaqyt boıy Ásel eshbir qujatsyz Tájikstanda turyp jatqan. 19 jyl ishinde tájik kúıeýimen ajyrasyp úlgeripti. Qazir Atyraý bıligi áıelge qujattaryn resimdeýge kómektesip jatyr.

Usynǵan: Nazerke Labıhan