Almaty oblysynyń Qorǵanys isteri jónindegi departamenti, biriktirilgen basqarmasy men bólimderinde shaqyrý ýchaskelerine tirkeý jumystary qyzý júrgizilýde.

Jergilikti áskerı basqarý organdary «Áskerı qyzmet jáne áskerı qyzmetshilerdiń mártebesi týraly» QR Zańyn basshylyqqa ala otyryp, 2002 jyly týylǵan jasóspirimderdi áskerı esepke alýda.

2019 jylǵy qańtar men naýryz aıynyń sońyna deıingi aralyqta oblys boıynsha 10126 azamatty shaqyrý ýchaskelerine tirkeý josparlanǵan. Bul byltyrǵy jylmen salystyrǵanda 5,5%-ǵa artyq. Búgingi kúni 9 992 adam áskerı tirkeýge alynyp, olarǵa saltanatty jaǵdaıda tirkeý kýálikteri tabystaldy. Tirkeý merzimi aıaqtalǵanǵa deıin bul tizim taǵy 134 jasóspirimmen tolyǵady.

Shaqyrý qaǵazyn alǵan azamattar tıisti jergilikti áskerı basqarý organdarynda jalpy bilimin, densaýlyǵyn, áskerı qyzmetke jaramdylyq deńgeıin anyqtaý maqsatynda medısınalyq tekserýden ótedi. Bul óz kezeginde áskerge shaqyrylý jasyna deıingi jastardy ásker qataryna daıyndaýǵa, olardyń sanyn anyqtaýǵa múmkindik beredi. Densaýlyqtarynda kinárat tabylǵandar joldama arqyly tıisti emdeý mekemelerinde em qabyldap, shaqyrylý jasyna deıin saýyǵyp kelý múmkindigine ıe.

Almaty oblysy qorǵanys isteri jónindegi departamenti bastyǵynyń orynbasary podpolkovnık Rýslan Abıhanovtyń aıtýynsha ásker qataryna alynyp, Otan qorǵaýǵa óz úlesimdi qossam degen jastardyń kóp bolýy kóńil qýantady.

– Deniniń saý bolýynan bólek olardyń moraldyq-psıhologıalyq jaı-kúılerin, quqyqtyq saýatty bolýlaryn basty nazarda ustaımyz. Tizimge tirkep, áskerge attandyrýdan bólek jasóspirimdermen áskerı-patrıottyq baǵyttaǵy tárbıe jumystary jıi júrgizilip otyrady, - dedi ol.

* Búgin men úshin mańyzdy qujat – tirkeý kýáligin qolyma aldym. Densaýlyǵymda kinárat joq, ásker qataryna attanýǵa daıynmyn. Armıa – jigittik mektebi, qıyndyqtan taısalmaı Otanymdy, halqymdy qorǵaýǵa árqashan ázirmin, - dedi Taldyqorǵan qalasynyń Polıtehnıkalyq kolejiniń 1-kýrs stýdenti Ersultan Shaıkenov.

Sondaı-aq, pýnktterge tirkeý barysynda áskerı oqý oryndarynda túsýge nıet bildirgenderge úgit-nasıhat jumystary da qosymsha júrgizilýde. Áskerı oqý boıynsha túsindirý jumystary maýsym aıyna deıin jalǵasady. Búgingi kúni Almaty oblysynyń 500-den astam azamaty QR Qarýly Kúshteriniń áskerı oqý oryndarynda bilim alýda.