Taldyqorǵanda erekshe ádispen sýret salatyn oqýshy turady. Arman Kárimjanovtyń kómir qaryndashpen gıperrealızm baǵytynda salǵan sýretteri kádimgi fotosýretten aınymaıdy.

Taldyqorǵan qalasyndaǵy №2 orta mekteptiń 11-synybynda oqıtyn Arman Kárimjanov sýret salý ónerine bes jasynan qyzyǵa bastaǵan. Alǵashqy kezde ol kóbine tabıǵatty, jyl mezgilderi men janýarlardy beıneleýdi unatatyn. Birneshe jyldan beri jańa gıperrealızm baǵytyna qyzyǵyp júr. Jalpy «gıperrealızm» grek tilinen aýdarǵanda taza shynaıylyq degen maǵynany bildiredi. Sondaı-aq, bul janrdy fotorealızm dep te ataıdy. Sýretshiniń belgili bir zatty nemese adamnyń beınesin aınytpaı túrli qaryndashtar men boıaýlardy qoldana otyryp qaǵazǵa túsirýin gıperrealızm deıdi. Bul termındi aınalymǵa 1973 jyly Isa Barhot engizdi.

Jáne bul baǵyt ótken ǵasyrdyń 60-shy, 70-shi jyldary óte qarqyn ala bastady. Qazirgi tańda álemniń ár buryshynda osy janrǵa bet burǵan sýretshiler qatary kóbeıip keledi. Osy baǵytqa den qoıǵan Arman Kárimjanovtyń qazirgi tańda onnan astam týyndysy bar. 

Jas sýretshi eki pildiń aıqasyn, maımyldy, afrıkalyq taıpalardyń qara násildi adamdaryn sheberlikpen qaǵazǵa túsire bilgen. Bul týyndylar týra bir sapaly fotoaparatpen túsirip, basyp shyǵarǵandaı áser qaldyrady.

Armannyń aıtýynsha, árbir sýretti salý úshin 70 saǵatqa deıin ýaqyt ketedi. Ásirese adam beınesin salý óte qıyn deıdi. Adam betiniń terisin, ondaǵy árbir núkte, ájim, kóz, kóńil-kúıin salý úlken sabyrlyqty qajet etedi. Jas talanttyń Djım Kerrı, Ien Makkelen syndy Gollıvýd juldyzdarynyń portretin dálme-dál keltirýi - osynyń dáleli.

«Óziniń qulaqqabyn kıip alyp, áserli mýzyka tyńdap, sýret salýǵa kiriskende biz kedergi jasamaýǵa tyrysamyz», - deıdi sýretshiniń anasy. 

Sondaı-aq anasy ulyna qajet barlyq qural-jabdyqtarmen qamtamasyz etýge tyrysady. Baqytgúl Kárimjanovanyń aıtýynsha, bul ońaı nárse emes. 

«Faberkast degen qaryndashtardy alǵanbyz. Bul germanıalyq qaryndash Germanıadan keledi. Qaǵazdary bul jerde satylmaıdy. Format A3, A2 ǵana satylady. Al bylaı uzyn, dáý qaǵazdar satylmaıdy», - deıdi ol.

Bıyl mektep bitiretin Arman sáýletshi bolǵysy keledi. Qurylys salasynda óz qoltańbasyn qaldyrmaq maqsaty bar. Ol úshin kún-tún demeı daıyndalyp, óz-ózin qamshylaýda. Jas sýretshi óz týyndylaryn halyqaralyq kórmelerge usynyp, baıqaýlarǵa qatysýda.