Máskeýde  Jeńistiń 70 jyldyǵyn merekeleý qarsańynda TMD memleketteri basshylarynyń beıresmı samıti ótti. Samıt barysynda taraptar  mereke jaıyn talqylap, Keńes Odaǵynyń Eýropa men búkil álemdi fashızmnen qutqarýdaǵy sheshýshi úlesin atap ótti. Sonymen qatar, TMD memleketteri basshylary keńesiniń kezekti otyrysyn bıylǵy qazan aıynda Astanada ótkizý múmkindigi qarastyryldy. Qazaqstan Prezıdenti Nursultan Nazarbaev bul jolǵy kezdesý ardagerler men tyl eńbekkerlerine kórsetilgen qurmet ekenin atap ótti. Memleket basshysy qazirgi kezde jekelegen saıasatkerler men memleketterdiń soǵys qortyndysyn tarıhı derekterdi burmalaý arqyly qaıta qaraýǵa umtylysy baıqalyp otyrǵanyna toqtaldy. "Mundaı áreket bizge jaramaıdy. Biz Jeńis týraly aqıqatty birlesip saqtaýǵa, bolashaqta osyndaı qasiretti boldyrmas úshin kelesi urpaqqa aıtyp jetkizýge tıispiz",-dedi Nursultan Ábishuly. TMD memleketteri basshylarynyń bul jolǵy jıynynda birazdan Reseıge qyńyr qaraıtyn Islam aka Karımov (Ózbekstan) pen Qyrǵyzstan Prezıdenti Almazbek Atambav arasynda daý shyqty. Almazbek Atambev óz kezeginde jeńistiń 70 jyldyǵyna oraı Máskeýde ótken merekelik paradqa qatysýdan bas tartqan TMD elderi Prezıdentterin qatań synǵa aldy. Atambaevtyń aıtýynsha, olar Ekinshi dúnıejúzilik soǵys ardagerleri men zulmatty jyldarda opat bolǵan maıdangerlerge, tyl ardagerlerine qurmetsizdik kórsetken. "Búgin ótkenin umytqandar, bolashaqtyń aldynda jaýap beredi",-dedi Almazbek Atambaev myrza. Sondaı-aq, Atambaev myrza otty jyldary Qyrǵyz Respýblıkasynan urys dalasyna attanǵan ár tórt jaýyngerdiń úsheýi maıdan dalasynan oralmaǵanyn aıta kele, "biz búgin ótken tarıhymyzdan bezip kete almaımyz",-dedi. Atambaevtyń aıtqan datyna ózbek Prezıdenti Islam Karımov óz jaýabyn qaıtarǵan. "Men Atambaev myrzanyń bul málimdemesin óte saýatsyz ári taktıkalyq mazmunǵa jatpaıtynyn aıtqym keledi. Siz aıtyp otyrǵan, tarıhty biz jaqsy bilemiz",-dedi Islam Karımov. Vladımır Pýtın óz kezeginde memleketterdiń basshylary atynan Nursultan Nazarbaevty ótken saılaýdaǵy jeńisimen quttyqtady. Sondaı-aq, Reseı Prezıdenti Qazaqstan bıyl TMD-ǵa tóraǵalyq etetinin atap ótti. Máskeýdegi EAEO-ǵa múshe elderi basshylary jıynynda Belorýsıa Prezıdenti Aleksandr Lýkashenko jumysty tezirek aıaqtap, Jeńistiń 70 jyldyǵyna arnalǵan merekelik sharalarǵa aýysýdy usyndy dep habarlaıdy news.mail.ru. Lýkashenko Qazaqstan Prezıdenti Nursultan Nazarbaevty jýyrdaǵy Prezıdent saılaýyndaǵy kezekti jeńisin qaǵytpa qaljyńmen quttyqtady.   "Árıne,  Nazarbaev jańa saılanǵan Prezıdent.  Qazir onyń kúsh-qaıraty, energıasy tasyp tur ǵoı. Bul kisige salsaq, jumystan bas kótere almaı qalamyz",-dep EAEO basshylaryn kúldirdi. Máskeýde ótken EAEO-nyń joǵarǵy keńesiniń qortyndy jıynynda sóz alǵan Belorýsıa Prezıdenti Lýkashenko myrza: "Biz merekege jınaldyq. Al ózimiz bolsaq túnge deıin jumys istep otyrmyz. Shyn aıtam, bulaı bolmaıdy ǵoı. Osy Reseıge kele qalsań boldy, jumys tabylyp turady",-dep Prezıdentterdiń ezýine taǵy bir qysyr kúlki úıirdi. Ary qaraı Lýkashenko óz sózin "Iá, eń az degende syndy durys qabyldarsyzdar, áıtpegende maqtaı beremiz, maqtaı beremiz. Osyny toqtatamyz-aý",- dep jalǵastyrdy.