27-28 aqpan kúnderi Vetnamnyń astanasy Hanoıda AQSH pen Soltústik Koreıa prezıdentteri kezdesti. Bul betpe bet júzdesýden barlyq álem bir jylylyq kútken. Alaıda Vetnamdaǵy kezdesý eshqandaı nátıje bergen joq. Aqyrynda eki jaqtyń delegasıasy qatysqan samıtte  prezıdentter eshqandaı qujatqa qol qoımaı tarasty. Bul týraly Aq úıdiń baspasóz hatshysy Sara Sonders málim etti.

Osydan birer jyl buryn AQSH pen Soltústik Koreıa prezıdentteriniń Sıngapýrde birinshi samıti ótkeni belgili. Endi mine segiz aıdan keıingi júzdesý de esh nátıje bermedi.

–AQSH jaǵy talap etken máselelerge Soltústik Koreıa daıyn bolmaı shyqty,–dep jaýap berdi buǵan qatysty Aq úıdiń baspasóz hatshysy Sara Sonders.

Al aqıqatyn aıtar bolsaq, bul qandaı másele?  AQSH tarapy o bastan Soltústik Koreıany ıadrosyz memeleketke aınaldyrýdy kózdedi. Biraq ıadrolyq shoqpary bar memleket Tramptyń yńǵaıyna kóne qoısyn ba?

AQSH prezıdenti Donald Tramp «bul kezdesý nátıjeli boldy» dep qaıtalap aıtqanymen, sarapshylar onyń jemisti ótkenine kelispeıdi. Soltústik Koreıadan poıyzben Hanoıǵa kelgen Kım Chen Yn óz eliniń ıadrosyz memleketke aınalýy qalamaıtynyn da ashyp aıtqan. Bul másele burynnan da belgili.

–Bul salada biz úlken progreske jettik. Biraq AQSH tarapy úshin úlken nátıjeli kezdesý bola qoıǵan joq. Kım Chen Yn buǵan daıyn bolmaı shyqty. Degenmen, áli de júzdesýler jalǵasady, –dep málimdedi Aq úıdiń baspasóz hatshysy Sara Sonders.

Tipti Donald Tramp pen Kım Chen Yn jeke kezdeskende de, erteńine keńeıtilgen quramdaǵy júzdesýde de eki jaq eshqandaı kelisimge kele almady. Osy ýaqytqa deıin Soltústik Koreıaǵa orasan zor sanksıa salyp kelgen AQSH bul joly taǵy da olardy qysymǵa ala ma, joq pa, ol jaǵy da belgisiz kúıinde qaldy. Soǵan qaraǵanda, Koreı túbegindegi kúrdelengen jaǵdaı sol kúıinde qala beretin sıaqty. Degenmen, kezdesýden keıin AQSH prezıdenti Donald Tramp Soltústik Koreıany ıadrosyz elge aınaldyrý máselesi kún tártibinde qala beretinin aıtty.

–Biz Soltústik Koreıany ıadrosyz elge aınaldyrǵymyz keledi. Phenán eń myqty ekonomıkalyq eldiń astanasy bolýy tıis. Muny Kım Chen Yn da túsinip otyr. Bul rette bizge Qytaı, Japonıa, Ońtústik Koreıa men Reseıdiń kómegi kerek,– dep málimdedi Donald Tramp.

Rasynda da Qytaı men Reseı Soltústik Koreıanyń ıadrosyz memleketke aınalýyn quptamaıdy. Reseı Syrtqy ister mınıstri Sergeı Lavrovtyń oıynsha, «eger bulaı bola qalǵan jaǵdaıda, Soltústik Koreıanyń qaýipsizdigine búkil memleketter kepildik berýi tıis. Biraq bul senimsiz nárse».

–Reseıdiń Soltústik Koreıamen 28 mıl qashyqtyqta shekaralyq shektesýi bar. Munyń ózi kóp nárseni baıqatady. Bizdiń oıymyzsha, Phenán Reseıden kóp kómek alyp otyr. Biraq jaǵdaıdy retteýge Reseı barynsha atsalysyp otyrǵan joq. Al  Soltústik Koreıa elge kerek-jaraqtyń bárin Qytaıdan alady. Máseleni sheshýge Qytaıdyń múmkindigi de óte úlken. Sondyqtan túıinniń tezirek sheshilýi eń aldymen atalǵan eki elge baılanysty, – dep atap ótti Aq úıdiń baspasóz hatshysy Sara Sonders.