Bilim jáne ǵylym mınıstri Kúlásh Shámshıdınova Úkimettiń búgingi otyrysynda orta bilimniń reformasy týraly aıtty dep xabarlaıdy Qamshy.kz aqparat agenttigi. 

Mınıstrdiń aıtýynsha, 2019-2021 jyldary aralyǵynda mektep, kolej ben joǵary oqý oryndarynyń 240 myńnan astam pedagogtary qaıta daıarlaý kýrstarynan ótedi.

«2020 jyldan bastap aǵylshyn tilin oqytýǵa arnalǵan kýrstarǵa qarastyrylǵan qarjy joǵary oqý oryndarynda osy tilde sabaq beretin muǵalimderdi daıyndaýǵa jumsalatyn bolady. Osy jyldan bastap mektepterge til meńgergen joǵary oqý oryndarynyń túlekteri kele bastaıdy. Pánderdi aǵylshyn tilinde oqytýdy kezeń-kezeńimen kadrlardyń daıyndyǵyna qaraı birtindep engizý josparlanyp otyr», - dedi K.Shámshıdınova Úkimettiń búgingi otyrysynda. 

Aıta keteıik, búgingi otyrysta K.Shámshıdınova Prezıdent tapsyrmasy aıasynda qaı qyzmetkerlerdiń jalaqysy kóteriletinin aıtty. 

«Bilim berý salasyndaǵy jalaqysy tómen qyzmetkerlerdiń eńbekaqysyn ulǵaıtý dıfferensıaldy túrde 30 prosentke deıin júzege asatyn bolady. Bilim salasynda 500 myńǵa tarta adamnyń jalaqysy ósedi dep kútilýde. Olardyń qatarynda mektepke deıingi uıymdar men ınternattardyń tárbıeshileri, olardyń kómekshileri, metodıster, áleýmettik pedagogtar, balabaqsha men kolej psıxologtary, qosymsha bilim berý uıymdarynyń qyzmetkerleri, kitapxanashylar, vojatyılar, býxgalterler, is júrgizýshiler, eden jýýshylar, kúzetshiler, ot jaǵýshylar, santexnıkter men elektrıkter sıaqty basqa da texnıkalyq qyzmetkerler bar", - dedi mınıstr.

Usynǵan: Maqpal Sembaı