2019 jyldyń 27 aqpan kúni bilimniń qarashańyraǵy ál-Farabı atyndaǵy  Qazaq ulttyq ýnıversıtetinde Fılologıa jáne álem tilderi fakúlteti Qazaq til bilimi kafedrasynyń uıymdastyrýymen «Men – qazaqpyn» atty jyr baıqaýy ótti. 

Atalmysh baıqaý Memlekettik syılyqtyń laýreaty, Qazaqstannyń halyq jazýshysy, aqıyq aqyn Juban Moldaǵalıevtyń týǵanyna 100 jyl jáne «Men qazaqpyn» poemasynyń jaryq kórgenine 55 jyl tolýyna oraı uıymdastyryldy.

Men – qazaqpyn myń ólip, myń tirilgen.
Jórgegimde tanystym muń tilimen
Jylaǵanda júregim, kún tutylyp,
Qýanǵanda kúlkimnen tún túrilgen, - dep jyr jazyp, júregimizde ulttyq rýhty oıatqan.

Aqynǵa degen qurmettiń orasan bolǵandyǵy sonsha, 4-11 synyp arasynda uıymdastyrylǵan sharaǵa júz elýge jýyq mektep oqýshylary qatysyp, baq synasty. 

Baıqaýdy uıymdastyrýdaǵy maqsat – aqyn jyrlaryndaǵy patrıottyq sezimdi jastardyń sanasyna uıalatý, ulttyq rýhty kóterý bolsa, sol maqsat oryndaldy deýge bolady. Sebebi, órimdeı ulandardyń órshil rýhta óleń oqyp, báıgeden oza shapqandary óte kóp boldy. Osy keshte «Men – qazaqpyn» poemasynyń qazaqtyń rýhyna sózben turǵyzylǵan eskertkish ekenin jastar taǵy bir dáleldedi. 

Bıyl QazUÝ-dyń qurylǵanyna 85 jyl tolýyna baılanysty baıqaýda úzdik óner kórsetken talapkerlerge mereıtoılyq osy sanmen astastyryla 85 júldeli oryn (İ, İİ, İİİ oryndar jáne alǵys hattar) taǵaıyndaldy. Kafedra aıasynda qurylǵan «Lıngvoarna» ǵylymı-zertteý ortalyǵynyń atynan aqshalaı, zattaı syılyqtar berildi. Bıyl mektep bitiretin túlekterge elimizdegi mańdaıaldy oqý orny QazUÝ-ge oqýǵa túsýlerine ıgi tilekter aıtyldy. 

Arnaý aıtylyp, qonaqkáde retinde oqýshylardyń óz ónerlerin tartý etken, ánmen, kúımen astasqan poezıa keshi oqýshylardyń oıynda uzaq saqtalary sózsiz.

Omar Balnur, Kamal Aqerke