Qala ákimi keı azyq-túlik ónimderiniń joǵary baǵalaryna ekonomıkalyq taldaý jáne aıqyn negizdeýdi qamtamasyz etýdi jáne olardyń baǵasyn tómendetýge qatysty naqty usynystar engizýdi tapsyrdy, - dep habarlaıdy Qamshy.kz aqparat agenttigi Astana qalasy ákimdiginiń resmı saıtyna silteme jasap.
Baqyt Sultanovtyń tóraǵalyǵymen Astana ákimdiginde kezekti otyrys ótti. Kún tártibindegi negizgi másele – áleýmettik mańyzy bar azyq-túlik taýarlarynyń baǵalary.
"Bizdiń tarapymyzdan baǵanyń ósýine jol berilmeıtin bekitilgen azyq-túlik tiziminde tek 19 pozısıa bar. Onyń ishinde kókónisterden tek qana kartop, qyryqqabat, sábiz jáne pıaz bar. Halyq úshin qajetti jemister, qyzanaq, qıar jáne basqa da kókónister joq. Jalpy aıtqanda, bul taýarlardyń baǵasyn eshkim rettemeıdi", - dedi Astana ákimi.
Ol 1 keli qyzanaq nemese qıar baǵasynyń 800-den 1000 teńgege deıin nemese odan da joǵary turatynyn tilge tıek etti. "Az qamtylǵan otbasylardyń eshqaısysy ony satyp ala almaıdy", - dedi Baqyt Sultanov osy oraıda.
Qala ákiminiń orynbasary Malıka Bekturovanyń aıtýynsha, aqpan aıynda Astanada ınflásıa qańtar aıynyń deńgeıinde qalǵan.
Ol 100,8 paıyz (respýblıka boıynsha 7 oryn), al áleýmettik mańyzy bar azyq-túlik taýarlar ındeksi ótken aptada 101,2 paıyz (respýblıka boıynsha – 0,6 paıyz) boldy. "Der kezinde qabyldanǵan sharalar boıynsha aınalym qarajatyn tolyqtyrý sheńberinde saýda jelilerine jeńildikti kredıt berý arqyly qarjylandyrý áleýmettik mańyzy bar taýarlardyń 2017 jyly 15 sanatyn, 2018 jyly 22 sanatyna baǵany tómendetýge jáne turaqty ustaýǵa múmkindik berdi. 2018 jyly ınflásıany tómendetýge múmkindik berdi. Turaqtandyrý qory qurylǵan. Búgin onda qant, kúrish, qaraqumyq, kartop jáne sábiz bar. Osy taýar túrlerine baǵa 15 paıyzǵa kóterilgende qaladaǵy saýda obektilerinde taýar ıntervensıalary ótkiziledi", - dedi M. Bekturova.
Onyń sózinshe, saýda úılerin kredıtteý arqyly baǵany turaqtandyrý óz nátıjesin bergen. Qazirdiń ózinde jobaǵa "Magným", "Shaıyr", "Metro", "Keńmart" saýda jelileri, "Sapar" bazary, "AstanaEkostandart" JSHS, "Agrokapıtal" JSHS jáne basqalar qatysýǵa daıyn.
Sonymen qatar, Bekturova "Shapaǵat" bazaryn jekeshelendirilýine baılanysty "AQ Astana" ÁKK-ǵa bazardyń jańa menshik ıeleri tarapynan tenderlik sharttardyń saqtalýyn erekshe baqylaýdy usyndy.
Qala ákimniń aıtýynsha búgin Qazaqstannyń kóptegen óńirlerinde nan baǵasy kóterilgen. Basty sebep - unnyń tapshylyǵy.
Qala ákimi budan buryn qala ákiminiń orynbasary Malıka Bekturovaǵa "Astana" áleýmettik kásipkerlik korporasıasynyń mehanızmderi arqyly elordanyń naýbaıhanalaryna undy jetkizýdi tapsyrǵan bolatyn.
Óz kezeginde Malıka Bekturova, ótken aptada premer-mınıstrdiń birinshi orynbasary Álıhan Smaıylov aýyl sharýashylyǵy jáne ulttyq ekonomıka mınıstrlikterine nannyń qymbattaýyn boldyrmaý úshin tıisti usynystar engizý boıynsha tapsyrma bergendigin jetkizdi.
"Biz óz tarapymyzdan usynys engizdik. Qazirgi kezde Azyq-túlik korporasıasy arqyly máseleni sheship jatyrmyz. Bul másele apta sońyna deıin sheshiledi", - dedi Bekturova.
Qala ákimi sondaı-aq, Memleket basshysy memlekettik organdardyń qyzmeti azamattardyń ál-aýqatyn jaqsartýǵa baǵyttaýdy tapsyrǵandyǵyn eske saldy.
Osy maqsatta 1 qańtardan bastap komýnaldyq qyzmetter tarıfteri, birqatar áleýmettik tólemniń mólsheri ulǵaıtyldy, halyqtyń ál-aýqatyn kóterý sharalary júzege asyrylyp jatyr.
"Nur Otan" partıasynyń sezinde Memleket basshysy halyqtyń áleýmettik osal toptarynyń kiristerin arttyrý boıynsha tapsyrma bergen.
Osyǵan baılanysty Baqyt Sultanov óz orynbasary Malıka Bekturova men Astana qalasynyń ınvestısıalar jáne kásipkerlikti damytý basqarmasynyń basshysy Álisher Ábdiqadyrovqa áleýmettik mańyzy bar azyq-túlik taýarlary baǵasynyń ósýine jol bermeýge, turaqty baqylaýdy qamtamasyz etýdi jáne olardyń maýsymdyq ósimine jol bermeý, ásirese mereke kúnderi baǵanyń kóterilýin boldyrmaýdy tapsyrdy.
"Áleýmettik mańyzy bar azyq-túlik taýarlarynyń tizimine kirmeıtin azyq-túlik ónimderiniń joǵary baǵalaryna ekonomıkalyq taldaý jáne aıqyn negizdeýdi qamtamasyz etińiz jáne olardyń baǵasyn tómendetýge qatysty naqty usynystar engizińiz", - dedi Sultanov.
