Búgin Májiliste «Halyqtyń kóshi-qony týraly» Zań jobasyna ózgertýler men tolyqtyrýlar engizýge arnalǵan altynshy otyrys ótti. Osyǵan deıin jalpy jobada turaqty tirkeýge turý men azamattyq alýǵa, jeńildikterden ıgiliktenýge arnalǵan tamasha baptar bar. Olar bir aýyzdan qabyldanyp ta qoıdy.
Endigi másele – EKİ ANYQTAMA!
Otyrystyń kúntártibine saı, biz usynǵan myna usynystar talqyǵa tústi.
Birinshi: 23-bap. Oralmandarǵa, etnıkalyq qazaqtarǵa jáne olardyń otbasy múshelerine beriletin jeńildikterge baılanysty, «Etnıkalyq qazaqtar jeke múlki bolyp tabylatyn aýyl sharýashylyq tehnıkalaryn keden salyǵynsyz alyp kelýge quqyly»;
Ekinshi: 32-bap. Bilim alý maqsatynda keletin kóship kelýshilerge kelýge vıza berýdiń sharttaryna baılanysty, «Qazaqstan Respýblıkasy Syrtqy ister mınıstrligi jáne Qazaqstan Respýblıkasynyń sheteldegi mekemeleri bilim alý maqsatynda kóship keletin etnıkalyq qazaqtarǵa kezeksiz nemese jeńildetilgen tártippen vıza beredi»;
Úshinshi: 33-bap, Bilim alý maqsatynda keletin kóship kelýshilerge baılanysty, «Qazaqstan Respýblıkasyna bilim alý maqsatynda kelgen etnıkalyq qazaqtar oqýǵa túskennen keıin oqý oryndarynyń jataqhanasyn qosa alǵanda turaqty tirkeýge turýǵa jáne Qazaqstan Respýblıkasynyń azamattyǵyn qabyldaý týraly ótinish berýge quqyly»;
Tórtinshi: Jobanyń 49-babynyń 2) tarmaǵyna baılanysty, «etnıkalyq qazaqtardy qospaǵanda sottalǵanǵa deıin turaqty turǵylyqty jeri Qazaqstan Respýblıkasynan tys bolǵan, bas bostandyǵynan aıyrý oryndarynan bosatylǵan»;
Besinshi: Jáne de Jobanyń 49-babynyń 9) tarmaǵyna baılanysty, «etnıkalyq qazaqtardy qospaǵanda aýyr nemese asa aýyr qylmys jasaǵany úshin sottalǵandyǵy bolǵan».
Obaly ne, jumys tobynyń jetekshisi Gúlnar Súleımenqyzy Seıitmaǵambetova apaıymyzdan bastap, Quttyqoja Ydyrysov, Gúlmıra Isimbaeva, Baqytbek Smaǵul, Almas Turtaev, Merýert Kazbekova, Aıqyn Qońyrov qatarly halyq qalaýlylary atalǵan usynystardyń qajet ekenin tolyq túsindi jáne qatysty mekemelerdiń basshylary men mamandarynyń ýájderin tolyq tyńdady.
Óte-móte oqý maqsatynda keletin etnıkalyq qazaq stýdentterine qatysty jeńildik qarastyrý jaǵyna kelgende Bilim mınıstrliginen kelgen maman Aqerke Abylaıhanqyzy ár jyly memeleket jaǵynan shetten keletin qandastarymyzǵa dep 1400 balaǵa JOO-da oqýǵa kvota bólinetinin, biraq sol talapkerlerdiń test tapsyratyn mezgilge úlgire almaı qalatynyn aıtyp, bul tarmaqtyń qajet ekenin aıqyndap berdi.
Jasyratyny joq, 33-bapqa bapqa kelgende, İİM Kóshi-qon polısıasy komıteti Tóraǵasynyń orynbasary Ǵalıa Sársenova qarsy shyqty.
Oǵan qarsy Depýtat Merýert Kazbekova jaýap berdi. Qaryndasymyz bul tarmaqtyń da kerek ekenin jaqsylap dáleldedi.
Al, 2011 jylǵy 22 shildeden beri qandastarymyzdyń turaqty tirkeýge turýyna kedergi bop kele jatqan Qazaqstan Respýblıkasynyń №477-IV «Halyqtyń kóshi-qony týraly» Zańynyń 49-babyndaǵy 2) jáne 9) tarmaqtaryna qatysty eki usynys týraly da kóp talqy boldy. Biz Qaırat Bodaýhan ekeýmiz óz tarapymyzdan eger bul joly da atyshýly EKİ ANYQTAMA alynyp tastalmasa, myna Zańnyń da quny kók tıyn bolatynyn, Qytaı jaǵynyń sotty adamdy shetelge shyǵarmaıtynyn qadap aıttyq.
Búgin otyrysqa zańger Maqsat Nurypbaı inimdi erte barǵanmyn. Maqsat İlıasuly eń damyǵan alty eldiń repotrıanttardy qabyldaıtyn zańyn tanystyra kelip, bul elderdiń birde bireýi kelýshilerdiń buryn sottylyǵynyń bar-joǵyna qaramaıtynyn atap ótti...
Jumys toby músheleriniń atalǵan bes usynystyń da óte mańyzdy ekenine, ony tolyǵymen qalaıda qabyldaý kerektigine kózderi tolyq jetti. Kelesi aptada ótetin otyrysqa deıin qajetti ataý-termınderdi durystap jazýǵa, qatysy mekemeler men mamandardyń odan ary pysyqtap jetildire túsýine qaldyrdy.
Bul Zań jobasyna Úkimet Elbasy Nursultan Ábishuly Nazarbaevtyń tikeleı tapsyrmasy boıynsha ózgertýler men tolyqtyrýlar engizip, Parlametke talqylaýǵa usynǵanyn bilesizder.
Sondyqtan, úmit aqtalady, minsiz Zań qabyldanady dep senemiz!
Aýyt Muqıbek
14.05.2015
Astana
