QR Mádenıet jáne sport mınıstri Arystanbek Muhamedıuly ánshi Dımash Qudaıbergenniń The World's Best baıqaýynan ketýine qatysty pikir bildirdi, dep habarlaıdy Qamshy.kz aqparat agenttigi inform.kz saıtyna silteme jasap.  

«Kez kelgen adam konkýrsta jeńimpaz atanýǵa tyrysady. Ásirese, ártisterdiń jeńiske degen qulshynysy joǵary. Bul - jarys. Biraq Dımash naǵyz azamattyq sheshim qabyldady, danalyqtyń dara jolyn kórsetti. Ol óziniń otandasy Danelıa Tóleshovamen birge kelesi kezeńge ótkenin kórdi. Sodan keıin konkýrstan bas tartatynyn málimdedi. Sebebi Danelıaǵa qaryndasy retinde qaraıdy, oǵan jol bergendi jón kórdi», - dedi A.Muhamedıuly.

Mınıstrdiń oıynsha, basqa básekelester bolǵanda Dımash jarys jolyn jalǵastyratyn edi. Biraq ol qashanda óziniń eshkimge uqsamaıtyn minezimen kózge túsedi. Al Danelıaǵa jol bergeni halyqtyń oǵan degen qurmetin kúsheıte tústi. «Endi, qazylar alqasy konkýrstyń qyzyqty ótkenin qalaıdy ǵoı. Sodan bolar, Dımashtyń sheshimin birden túsine almady. Sebebi konkýrsqa ótýdiń ózi ońaı emes. Dımash bolsa, fınalǵa ótti. Al saýalnama boıynsha birinshi bolyp turdy. Álbette, bári onyń jeńimpaz bolatynyn bildi. Dımash óte durys ári dana sheshim qabyldady», - dep atap kórsetti A.Muhamedıuly.

Aıta keteıik, ótken aptada ánshi Dımash Qudaıbergen Amerıkadaǵy «The World's Best» baıqaýynan ketkenin málimdegen bolatyn.

Osydan keıin qazaq ánshi ózine qoldaý kórsetken jankúıerlerine alǵysyn bildirdi. «Qoldaý bildirgenderińiz úshin barlyqtaryńyzǵa shyn júrekten alǵysymdy aıtqym keledi. Baıqaýdyń fınalynan bas tartqanyma qaramastan, telekórermender arasynda birinshi orynnan kórinip otyrmyn - onyń bári de sizderdiń arqalaryńyzda bolyp jatyr. Men úshin daýys bergenderdiń báriniń aldynda basymdy ıemin. Ózimniń irili de usaq jeńisimniń bárin de jankúıerlerime arnaımyn. Shoýdyń  Lıdıan Nedashvaram men Danelıa Tóleshova sekildi jas ónerpazdary Mosart pen Selın Dıondaı áıgili bolsyn. Men olardy jeńisimen quttyqtaımyn!», - dep jazdy Dımash Qudaıbergen Instagramdaǵy paraqshasynda. 

Usynǵan: Maqpal Sembaı