Astanadaǵy eńbekpen qamtý ortalyǵy turǵyndardan 1 sáýirge deıin ataýly áleýmettik kómek surap, mazalamaýdy surady. Óıtkeni, turmysy tómen otbasylarǵa tólener járdemaqy burynǵysha eseptele beredi, al ony qaıta rásimdeý jumystary jarty jyldan keıin bastalady. Bul týraly memlekettik qyzmetter jármeńkesinde málim boldy dep Qamshy.kz aqparat agenttigi "Astana" arnasyna silteme jasaı otyryp habarlaıdy.

Astanadaǵy eńbekpen qamtý ortalyǵy turǵyndardy 1 sáýirge deıin ataýly áleýmettik kómekti surap, mazalaýdyń jóni joq deıdi. Óıtkeni, az qamtylǵan otbasylarǵa tólener járdemaqy burynǵysha eseptele beredi, al ony qaıta rásimdeý jumystary jarty jyldan keıin bastalady. Bul týraly memlekettik qyzmetter jármeńkesinde málim boldy. Kómek suraı barǵan alty balanyń anasy Janar Ómirbekovaǵa mamandar osylaı keńes beripti. Kópbalaly ana buǵan deıin ataýly áleýmettik kómek surap barmaǵan. Járdemaqy mólsheri az bolsa da, ony qaıta rásimdeýge ýaqyty bolmapty. «Endi 1 sáýirden bastap, bul shańyraqqa beriler áleýmettik kómektiń kólemi shamamen 14 esege deıin kóbeıedi»,- deıdi mamandar.  

Inna Fılaretova, Astana qalasy «Almaty» aýdany eńbekpen qamtý jáne áleýmettik qorǵaý bóliminiń basshysy:  Bul otbasyǵa 153 myń teńge tólenedi. Sondyqtan, 1 sáýirden bastap, eńbekpen qamtý Ortalyǵyna jolyǵyńyz. Tólemaqy mólsheri 6 aıǵa esepteletindikten, qazir bizge jolyǵýdyń qajeti joq. Sizdi qazir qabyldasa, 11 myń teńge ǵana taǵaıyndaıdy. Sosyn jarty jyldan keıin ǵana kelesiz. Al 1 sáýirde bir kelseńiz, tıisti soma túgel esepteledi.

Mamandar kópbalaly analar ǵana emes, turmysy tómen otbasylarǵa da kómek beriletinin eskertedi. Tapqan tabysy tómengi kúnkóris deńgeıiniń 70%-y jetpeıtin otbasylarǵa járdemaqy beriledi. Biraq, onyń mólsheri aımaqtyq álde jalpy respýblıkalyq deńgeıde bolaryn mamandardyń ózderi tap basyp aıta almaı otyr. Naqty sheshimdi Eńbek jáne áleýmettik qorǵaý mınıstrligi berýi tıis.  

"Qazir árbir aımaqtaǵy tómengi kúnkóris mólsheri toqsan saıyn ózgeredi, ár óńirde túrlishe esepteledi. Sondyqtan, kómek kólemin naqtylaý úshin mınıstrliktiń sheshimin kútemiz. Bul járdemaqy el aýmaǵyndaǵy nemese belgili bir oblystaǵy tómengi kúnkóris mólsherine negizdeledi", -  deıdi Inna Fılaretova.

Usynǵan: Farıza Jomartqyzy