"Taqta otyrǵan kezde jaqsylyǵyn jyrlasaq "jaǵympazsyń" dep tildeýshiler tabyla ketýshi edi, orynyn bosatty ǵoı endi aıta bersek aıyp joq shyǵar...
Men biletin Elbasynyń jeti qyry.
Birinshiden: Shekarańdy shegendep turyp bekitti me, bekitti. Biz túgili alpaýyt ımperıalar Qytaı men Reseıdiń arasyndaǵy shekaralar tolyq bekimegenin eskersek, Elbasymyzdyń bul eńbeginiń ólshemi joq deýge bolady.
Ekinshiden: Abylaı armandaǵan Astanańdy saldy ma, saldy. Salǵanda qandaı ǵyp saldy deseıshi?... Segiz sottyq jerimizdiń qaı jerine ne salarymyzdy bilmeı, retin keltirip ıgere almaı basymyz qatyp júrgende, Saryarqanyń qaq tórinen bes qurlyqqa uıalmaı kórsete alatyndaı ǵajaıyp shahar salyp berdi.
Úshinshiden: Qazaq-qazaq bolǵaly besinshi paryzyn (qajylyǵyn) ótegen alǵashqy hanymyz osy kisi. Kereı men Jánibekten beri qaraı 550 jylymyzda el bılegen qyryqqa jýyq handarymyz ben bekterimizdiń birde-biri qajylyq paryzyn óteı almapty. Ótemeıin degen joq, alasapyran zamandarda eldi tastap ketetindeı múmkinshilikteri bolmady. Sol handar men sultandarymyzdyń armanyna Nur Sultan jetti.
Tórtinshiden: Otyz jyl bılik quryp, elin soǵyssyz basqarǵan jalǵyz patsha da osy kisi eken. Taǵy da tarıhqa qarańyzdar. Otyz-qyryq jyl el bılegen Haq nazar, Áz Táýke syndy aıbarly handarymyz bolmady emes -boldy. Biraq olardyń zamandary jaýgershilikpen, keń baıtaq dalamyzdy qalaı qorǵap qalsaq degen alasapyran qan maıdandarmen ótti. Alla taǵala qalaı degende de Nursultannyń patshalyq dáýirin soǵystan ada, beıbit te berekeli etti.
Besinshiden: Qazaq dalasyndaǵy ıslamnyń týy, ımannyń nury bolǵan meshitterimizdi kóbeıtti. Táýelsizdik alǵan tusta elimiz boıynsha nebári 40-shaqty meshit qana jumys istep turǵan bolsa, 25 jylda sol meshitterimizdiń sany eki jarym myńǵa jýyqtady. Bul degenimiz rekordtyq kórsetkish. Tipti patshalyq dáýiriniń eń sońǵy isi de TMD men ortalyq Azıadaǵy teńdesi joq meshittiń irgetasyn qalaý boldy.
Altynshydan: Qazaqtyń qara domalyq balalaryn álemniń eń ozyq degen oqý oryndarynda bilim alǵyzyp, oza shapqandaryn el isine aralastyryp ketti. Bul túsingen adamǵa táýelsizdiktiń eń tátti jemisteriniń biri dese de bolady.
Jetinshiden: Qazaq tarıhyndaǵy han taǵyn óz erkimen bosatqan alǵashqy hanymyz da osy Nursultan. Tarıhta eshbir han-sultandarymyz ajaly jetpeıinshe taǵynan ketpegeni bárimizge aıan. Endeshe el úshin týǵan esil erdiń jasaǵan sheshimin Alla Taǵala eki dúnıemiz úshin qaıyrly qylǵaı, ámın."
Aqyn, "Daryn" memlekettik jastar syılyǵynyń laýreaty
♦Birjan Baıtýovtyń feısbýktegi paraqshasynan alynǵan
Usynǵan: Maqpal Sembaı
Pikir qaldyrý