Bul kúnniń bolary anyq edi. Alaıda, bundaı jedeldikti kútpeppin. Jaryq kúndegi naızaǵaıdaı tosyn jaıt. Qulaǵyma senbedim. Ras eken. Qulazyp qaldym. Ózi aıtpaqshy, ómir zańy!

Zý etip kóz aldymnan shırek ǵasyrdan astam ýaqyttyń tizbegi óte shyqty. Qazaqtyń qatarǵa qosylyp, baıraq kótergen baqytty shaǵy. Qandasyn qarashańyraqqa qaıtarǵan, Astanasyn anyqtap, shekarasyn shegendep, aýzy aqqa tıgen baqytty shaǵy! 
Tórtkúl dúnıeniń tórt buryshyna barsa da, "Men qazaqpyn" degen sózdi qaımyqpaı, qomsynbaı aıtatyn dárejege jetken baqytty shaǵy!
Jaýyn kúıindirip, dosyn súıindirgen munaradaı munartqan shaǵy! 

Sol munarany qolymen qalaǵan qalaýly jan qarasha halqyna ókilettigin ótkizetinin aıtty. Júregim shym etti. Tolqyp kettim. O kisiden de tolqý kúttim. Selt etpedi! Alashtyń altyn dáýiriniń tutqasy miz baqpady. Beıne Astanadan Almatyǵa ushqan jolaýshydaı alańsyz. Netken temir júıke! Netken márttik!

Alashtyń azanyn jańǵyrtyp, qazanyn maılaǵan asyl tulǵa alańsyz sóılep otyr. Sol mańǵaz, sol tekti qalpy!
Taǵy tańǵaldym. Iá, taǵy tańǵaldym. Otyz jyl el basqarǵanda, qandaı qadam jasaryn jatqa da, jaqynǵa da boljatpaǵan sarabdal qalpynan tanbaı sóıledi. Suńǵylaǵa da, surqıaǵa da syr aldyrmastan taǵyn tapsyrdy. Tarıh-shaldyń ózi tań qalǵandaı.

Úırene júrip úıretken, úırete júrip úırengen, albyrtty aýyzdyqtap, salǵyrtty qamshylap, aqsaqaldyń aqylyna, jastyń jalynyna, eldiń sabyryna súıene júrip, qazaǵyn shyńǵa bastaǵan beıbit te berekeli otyz jyl otyz kúndeı bolmaı óte shyǵypty. At tóbelindeı óz eli túgili, alpaýyt ózge eldiń kósemderi keńesine júginip, ara aǵaıyndyqqa salsa, aqylynyń asqandyǵy da! Jurty qımasa, qadiriniń asqandyǵy da! Alashtyń alǵysy aıryqsha ózińe, asyl tulǵa Nur-aǵam!

Bekbolat Tileýhannyń feısbýk paraqshasynan alynǵan

Usynǵan: Ásel Bolatqyzy