Asa qadirli Nursultan Ábishuly!

      Sizdiń halyqqa arnaǵan Joldaýlaryńyzdy qazaqstandyqtar qashanda asa úlken yqylaspen kútedi, tyńdaıdy. Óıtkeni onda únemi el damýynyń strategıalyq joldary kórsetilip, jumys baǵyt-baǵdary aıqyndalyp beriledi.

      Qazaqstan Respýblıkasynyń Prezıdenti ókilettigin toqtatýyńyz týraly búgingi Joldaýyńyzdy qazaqstandyqtar, onyń ishinde qazaq óneriniń qara shańyraǵy M.Áýezov atyndaǵy Qazaq memlekettik akademıalyq drama teatrynyń ujymy tolqı, erekshe tebirenispen tyńdadyq.

      Sizge «Táýelsiz eldiń alǵashqy basshysy bolý mártebesi  buıyrdy». Ózińiz júrgizgen memlekettik sarabdal saıasatyńyzdyń arqasynda Qazaqstan shyn mánisindegi táýelsiz de erkin, ekonomıkasy men mádenıeti damyǵan órkenıetti elge aınaldy, álem qaýymdastyǵynan laıyqty oryn aldy.

      Mádenıet salasyndaǵy memlekettik saıasatyńyz – mádenı jáne rýhanı qundylyqtardy jasaýǵa, jańǵyrtýǵa, qaıta túletýge, saqtaýǵa, damytýǵa, taratýǵa jáne paıdalanýǵa baǵyttalǵanyn maqtanyshpen aıtýymyzǵa bolady. Táýelsizdik jyldary ulttyq óner, sahna óneri qulashyn keńge jaıdy. Ózińizdiń bastamańyzben Respýblıkada táýelsizdik jyldary kóptegen jańa teatrlar ashyldy, talantty birneshe jas býyn ósip shyqty.

      95 jyldyq tarıhy bar qara shańyraq, álemniń kóptegen elderinde óner kórsetý mártebesine ıe bolǵan M.Áýezov teatry Ózińizdiń «Qazaqstan-2050» strategıalyq baǵdarlamańyzda atap kórsetilgendeı, «Qazaqstannyń mádenıetti jáne progresıvti ıdealdar qoǵamyna aınalýy...»  jolynda  aıanbaı  eńbek etip keledi. Ózińiz bastamashy bolǵan «Rýhanı jańǵyrý» memlekettik baǵdarlamasy aıasynda atqarylǵan, áli de aqarylatyn jumystar az emes.  

       Keshegi tarıhı Joldaýyńyzda Ózińiz elimizdi basqarǵan 30 jyl boıy atqarylǵan jumystar týraly birneshe sóılemmen ǵana túıip aıtyp óttińiz. Al, munyń astarynda Sizdiń aqyl-parasatyńyz, danalyǵyńyz, qanshama jan eńbegińiz, kúsh-qýatyńyz bar ekenin halyq jaqsy biledi. Bizder, sahna qaıratkerleri, onyń ishinde M.Áýezov teatrynyń ujymy shyn mánisindegi táýelsiz Qazaq eliniń tuńǵysh Prezıdenti, dara Tulǵa, qaıtalanbas qubylys  – Ózińizben zamandas bolǵanymyzǵa, ustanǵan sara baǵytyńyzdy murattastyqpen qoldap, eńbek etip kele jatqanymyzǵa baqyttymyz. 

      Sizdiń keshegi tarıhı Joldaýyńyzdyń árbir sózi, sóılemi bizderdi qatty tolqytty. «Maǵan uly halqyma, týǵan jerime qyzmet etý baqyty buıyrdy. Barshańyzǵa – halqyma zor rızashylyǵymdy bildirip, basymdy ıemin» dedińiz.  Bizderge Ózińizdeı Elbasy buıyrǵanyna bizder de asa baqyttymyz. Jáne Tuńǵysh Prezıdentimizge búkil Qazaqstan halqy, olardyń qatarynda M.Áýezov teatry ujymy da asa úlken yrzashylyǵymyzdy bildirip, basymyzdy ıemiz.

      Qazaqstan halqyna keshegi Joldaýyńyzda: «...Eleýli ókilettigi bar Qaýipsizdik Keńesiniń Tóraǵasy retinde qyzmet ete beremin. «Nur Otan» partıasynyń Tóraǵasy, Konstıtýsıalyq Keńestiń múshesimin. Iaǵnı ózderińizben birge bolamyn. Elimizdiń, halqymyzdyń qamy – meniń múddem bolyp qala beredi» degen sózińiz bizge qanat bitirip, kóńilimizge senim uıalatty.

      Biz, sahna qaıratkerleri Elimizdi jańǵyrtý prosesteriniń baıandy jalǵasatynyna senemiz jáne Máńgilik elimizdi saqtaý úshin qolymyzdan kelgendi aıamaımyz dep ýáde beremiz.

Asa úlken qurmetpen,

KSRO Halyq artısi, KSRO, QazKSR Memlekettik syılyqtarynyń laýreaty, Táýelsiz «Tarlan» syılyǵynyń, «Otan», «Qurmet», «Qazaqstannyń Eńbek Eri» ordenderiniń ıegeri, Kórkemdik jetekshi Asanáli Áshimov.

Qazaqstannyń Halyq artısi, Memlekettik syılyqtyń laýreaty, «Mádenıet salasynyń úzdigi» tósbelgisiniń ıegeri Sábıt Orazbaev,

Qazaqstannyń halyq artıseri Núketaı Myshbaeva men Torǵyn Tasybekova,

Teatr dırektory, Qazaqstannyń eńbek sińirgen qaıratkeri, Qazaqstan Jastar Odaǵy syılyǵynyń laýreaty, «Daryn» memlekettik jastar syılyǵynyń ıegeri Sábıt Ábdihalyqov,

Qazaqstannyń eńbek sińirgen qaıratkeri Jalǵas Tolǵanbaı,

Qazaqstannyń eńbek sińirgen qaıratkeri,  Qazaqstan Jastar odaǵy syılyǵynyń laýreaty Azamat Satybaldy,

Qazaqstannyń eńbek sińirgen qaıratkerleri  Berik Aıtjanov pen Erkebulan Daıyrov,

Qazaqstan Jastar odaǵy «Serper» syılyǵynyń ıegeri Aıan Ótepbergen jáne barsha teatr ujymy