Búgin Almaty qalasynda naýryz merekesin toılaý keremet deńgeıde boldy dep habarlaıdy Qamshy.kz aqparat agenttigi.
Almaty qalasynyń turǵyndary men qala qonaqtaryn qazaq halqynyń tól merekesimen quttyqtaǵan qala ákimi Baýyrjan Baıbek Nursultan Nazarbaev týraly da erekshe pikirin aıtyp ótti.
"Ardaqty almatylyqtar! Qadirli qonaqtar!
Barshańyzdy Ulystyń Uly kúni – Áz-Naýryz merekesimen shyn júrekten quttyqtaımyn!
Naýryz – kún men túnniń teńelgen, tirshilik ataýlynyń jandanyp-jasanǵan, jer-dúnıeniń túlep-túrlengen kúni. Halqymyzben birge jasasyp kele jatqan tól merekemiz.
Araǵa uzaq jyldar salyp, 1988 jyldyń kókteminde bir top ult zıalylarynyń uıytqy bolýymen Almatyda alǵash ret toılanǵan edi. Osylaısha uly merekemiz qaıta jańǵyryp, Qazaqstannyń Tuńǵysh Prezıdenti Nursultan Ábishuly Nazarbaevtyń 1991 jylǵy 15 naýryzdaǵy jarlyǵymen memlekettik sıpat aldy.
Biz bıylǵy Naýryzdy erekshe jańalyqtarmen qarsy alyp otyrmyz. Kúni keshe, ıaǵnı 19 naýryzda Elbasy óziniń Prezıdenttik ókilettigin toqtatý týraly tarıhı sheshimin málimdedi. Osynaý qadamy arqyly Elbasy taǵy da eldik dástúrimizdiń ozyqtyǵyn kórsetti.
Elbasy Nursultan Ábishuly Nazarbaev – Qazaq eliniń jańa dáýirdegi jasampaz tarıhynda ǵana emes, adamzat tarıhynda da úlken bedelge ıe sańlaq saıasatker,kemeńger tulǵa.
Keńes odaǵy kúıregen óliara tusta el tutqasyn qolyna alyp, azattyǵymyzdy jarıalady. Elimizdiń shekarasyn shegendep, memlekettiligimizdi bekemdedi. Ata zańymyzdy, ulttyq rámizderimizdi bekitip, ulttyq valútamyzdy engizdi. Syrttaǵy qandastarymyzdy elge shaqyryp, Uly kóshke jolashty.
Qazaqstan halqy Assambleıasyn qura otyryp elimizdegi barsha ult pen ulysty bir shańyraqtyń astyna biriktirip, etnıkaaralyq kelisimniń qazaqstandyq modelin qalyptastyrdy.
El astanasyn Alataýdan Arqaǵa kóshirdi. Esil boıynda tańǵajaıyp zamanaýı elorda salyp, ony Batys pen Shyǵystyń arasyn jalǵaǵan, tórtkúl dúnıeniń saıasaty toǵysqan Baǵanaly ordaǵa aınaldyrdy.
Táýelsizdiktiń eleń-alańynda«Bolashaq» halyqaralyq stıpendıasyn taǵaıyndap, elimizdiń myńdaǵan jastaryna álemniń eń ozyq ýnıversıtetterinde bilim alýyna jaǵdaı jasady. Al Qazaqstanda «Nazarbaev» ýnıversıteti men «Nazarbaev zıatkerlik mektepterin» ashty.
Qarapaıym qazaqstandyqtardyń ál-aýqatyn arttyrýdy qashanda memlekettik saıasattyń basty ózegi etip otyrdy.
Bir sózben aıtqanda, Elbasy halqymyzdyń ǵasyrlar kútken armany men ańsaryn iske asyrdy.
Árıne, Qazaqstannyń Tuńǵysh Prezıdenti – Elbasy Nursultan Nazarbaev Prezıdenttik ókilettigin toqtatqanymen, Qazaqstan halqy Assambleıasynyń, «Nur Otan» partıasynyń, Qaýipsizdik keńesiniń tóraǵasy bolyp qala beredi. Osyǵan deıin Elbasynyń bastamasymen tujyrymdalǵan elimizdiń damý strategıasy, ishki-syrtqy saıası basymdyqtary ári qaraı sabaqtastyǵyn úzbeı, óz jalǵasyn taba beretindigin kúni keshe ǵana ant qabyldaǵan Memleket basshysy Qasym-Jomart Kemeluly Toqaev basa aıtty.
Jańadan taǵaıyndalǵan Memleket basshysy Elbasynyń eren eńbegin ulyqtaý maqsatynda omyraýyna «Altyn juldyz» taǵyp, «Halyq qaharmany» ataǵyn berdi. Elbasynyń tól týyndysy bolyp sanalatyn elordamyzdy «Nursultan» dep ataýdy, elordamyzda Elbasyna arnalǵan monýment turǵyzýdy, elimizdiń barlyq oblys ortalyqtarynda Nazarbaev atyna kóshe berýdi usyndy.
«Almaty – Elbasy– Táýelsizdik» ajyramas uǵym.Elimizdiń táýelsiz tarıhynyń jarqyn betteri Almatyda ashylǵan. Nursultan Nazarbaev memlekettiligimizdi tuǵyrly, eldigimizdi ǵumyrly eter kóptegen asa mańyzdy qujattarǵa da osy Almatyda qol qoıǵan. Elbasynyń sózimen aıtqanda, «Almaty – Táýelsizdiktiń altyn besigi».
Sondyqtan da Almaty qalasy árdaıym Elbasynyń erekshe nazarynda, turaqty qamqorlyǵynda" - degen ystyq lebizin bildirgen qala ákimi naýryz merekesi Almaty qalasynda tórt kún boıy toılanatynyn atap ótti.
"Bizdiń tileıtinimiz – kelip jetken Áz Naýryz memleketimizge, ár otbasyǵa baq pen bereke, yrys pen yntymaq alyp kelsin. Elimiz aman, jurtymyz tynysh bolsyn. Birligimiz ben berekemiz arta bersin. Táýelsizdigimiz tuǵyrly, eldigimiz baıandy bolsyn!
Ulystyń uly kúni qutty bolsyn aǵaıyn!"- dep quttyqtaýyn aıaqtaǵan Baýyrjan Baıbek Almaty qalasynyń turǵyndary men qonaqtarynyń kóńilin qaldyrmaı, sýretke túsip, dámnen aýyz tıdi.
Usynǵan: Maqpal Sembaı
