Aqjoltaı jańalyq, Alash jurty! 6 mamyrda Peterbordaǵy aty ańyzǵa aınalǵan mergen qyzdyń esimin ıelengen kóshedegi saıabaqta Álıa Moldaǵulovanyń eskertkishi ashylady. Bul bastamany kótergen Qazaqstannyń Reseıdegi elshiligi. Peterbordyń qala qurylysy keńesi otandyq músinshi Edige Rahmadıevtiń úlgisin maquldady. Qala gýbernatory ákimshiliginiń baspasóz qyzmetiniń málimeti boıynsha, bıiktigi 3 metrlik qoladan quıylatyn kompozısıa qyzǵylt granıtten jasalǵan tuǵyrǵa ornatylady. Granıttik bólikte «Álıa Moldaǵulova» degen jazý men batyrdyń juldyzy oıylyp jazylady. Tuǵyrdyń ekinshi betine Álıanyń kórsetken erligi týraly qysqasha aqparat salynady.
Qazaqtyń naǵyz batyr qyzy – Álıa Moldaǵulova 1924 jyly 15 maýsymda Aqtóbe oblysy, Qobda aýdany, Bulaq aýylynda týǵan. 1944 jyly 14 qańtarda Pskov oblysy, Novosokolnıkı aýdany, Kazachıha derevnásynda qaıtys boldy. Álıa 9 jasynda anasynan aırylyp, Almatydaǵy aǵasynyń qolynda turady. 11 jasynan bastap sol kezdegi Lenıngrad qalasy, Krasnogvardeıskıı aýdany, Gýrdın kóshesindegi №46 balalar úıinde tárbıelengen. №9 orta mektepte oqydy. Oqýdaǵy ozattyǵy, úlgili tártibi úshin Qyrymdaǵy Artek lagerine barady. Soǵys bastalǵanda balalar úıimen birge Iaroslavl oblysynyń Vátskoe selosyna kóshirilip, 7-inshi synypty bitirgen soń, Rybınsk avıasıalyq tehnıkýmyna túsedi. Kóp uzamaı 1942 jyly maıdanǵa jiberiledi. Bir jyldan soń mergender mektebin támamdap, №54 arnaıy atqyshtar brıgadasy, 4-inshi batalónynyń mergeni (2-inshi Baltyq jaǵalaýy maıdany, 22-inshi ásker) bolady. Qaharman qyz 1944 jyly Lenıngrad-Novgorod operasıasy kezinde jaýdyń 70-ten astam ofıserleri men soldattarynyń kózin joıǵan. Sol jyly 14-inshi qańtarda Pskov oblysynyń soltústigindegi Novosokolnıkı aýdanynda qaza tapqan. Denesi Monakova aýylynda jerlengen. 1944 jyly Álıa Moldaǵulovaǵa Keńes odaǵynyń batyry ataǵy berildi.
Álıanyń eskertkishi Aqtóbe, Almaty, Nur-Sultan, Máskeý, Novosokolnıkı qalalarynda bar.
Tólen Tileýbaıdyń Facebook paraqshasynan alyndy
Usynǵan: Nazerke Labıhan
Pikir qaldyrý