Eńbek jáne halyqty áleýmettik qorǵaý vıse-mınıstri Svetlana Jaqypova ár balaǵa beriletin 21 myń teńge járdemaqyǵa ótinishtiń qashan qabyldanatynyn aıtty dep habarlaıdy Qamshy.kz aqparat agenttigi QazAqparattyń deregin negizge alyp. 

"Biz keshe ǵana selektor ótkizdik. Mınıstrdiń tapsyrysy bar. Qazir ákimdik, "Azamattarǵa arnalǵan úkimet" memlekettik korporasıa, sosyn bizdiń jergilikti departamentterimiz jáne jumyspen qamtý ortalyqtary bar ǵoı. Olardyń bári ótinishterdi qabyldaıdy", - deıdi Svetlana Jaqypova.

Vıse-mınıstrdiń aıtýynsha, 1 sáýirden bastap ótinish berýdiń qajeti joq. Sebebi aldymen zań kúshine enýi kerek. Sonyń negizinde mınıstrdiń birneshe buıryǵyna qol qoıylady. Atalmysh qujattar jergilikti atqarýshy organdarǵa túskennen keıin ǵana ótinishter qabyldana bastaıdy. Biraq ataýly áleýmettik kómektiń bári 1 sáýirden bastap esepteledi.

"Men ózim birneshe ret aıttym, halyqqa 1-nen bastap ótinish berińizder dep aıtýǵa bolmaıdy. Sebebi zań endi ǵana qabyldanady. Atalǵan qujat 28 naýryzda senattyń keńeıtilgen otyrysyna shyǵarylady. Odan keıin senat maquldap, qoldasa, Elbasynyń qol qoıýyna jiberiledi.

Al qazirgi zańǵa sáıkes, ataýly áleýmettik kómek ótinishti bergen kúnnen emes, bergen aıdan bastap taǵaıyndalady. Demek, azamattar 15 sáýirde kele me, 29 sáýirde kele me, báribir ataýly áleýmettik kómek olarǵa 1 sáýirden bastap taǵaıyndalady. Osy norma saqtala beredi", - dep atap kórsetti Svetlana Jaqypova.

Vıse-mınıstrdiń sózine qaraǵanda, búginde mınıstrdiń arnaıy buıryqtary daıyn tur. Zań qabyldansa, atalǵan qujattar birden Ádilet mınıstrliginiń tirkeýinen ótedi.

Sóıtip, barlyq jergilikti atqarýshy organdarǵa taratylady. Sodan soń ótinishter qabyldanady.

"Sondyqtan 1 sáýirden baryp, ótinishti qabyldaýdy talap etse de, jergilikti atqarýshy organdar ony qabyldaı almaıdy. Olardyń barlyǵy buıryqty kútedi. Elbasy zańǵa qol qoıdy ma, ertesinde birden buıryq tirkeýden ótýi kerek. Biz bárin daıyndap qoıdyq. Jergilikti atqarýshy organdar da birden habaryn beredi", - dep túsindirdi eńbek jáne halyqty áleýmettik qorǵaý vıse-mınıstri.

Esterińizge sala keteıik, Qazaqstannyń tuńǵysh prezıdenti ár balaǵa beriletin jeke áleýmettik kómek kólemin kem degende 21 myń teńgege deıin kóterýdi tapsyrǵan bolatyn.