Aýrýhananyń stasıonarynda 13 zardap shegýshi em qabyldaýda. Olardyń beseýine shuǵyl operasıa jasalǵan, dep habarlaıdy Qamshy.kz aqparat agenttigi qala ákimdiginiń resmı saıtynyń deregin negizge alyp. 

«№2 aýrýhanaǵa 29 zardap shegýshi jetkizildi, onyń 14-i ambýlatorlyq jaǵdaıda qaraldy, barlyǵyna medısınalyq kómek kórsetilip, úılerine jiberildi. Qazir stasıonarda 13 adam em qabyldaýda. Onyń segizi túrli jaraqatpen hırýrgıa bóliminde emdelip jatyr. Al úsheýi jansaqtaý bóliminde jasandy tynys alý quralyna qosylǵan. Olardyń jaǵdaıy aýyr dep baǵalanyp otyr. Eki naýqas torakaldy hırýrgıa bóliminde», – dep málimdedi  №2 qalalyq aýrýhananyń bas dárigeri Ivan Lı.

Onyń aıtýynsha, kesheden beri ómirine qaýip tóngen bes adamǵa shuǵyl operasıa jasalǵan. Taǵy qosymsha operasıalar jasaý kózdelýde. Qazirgi tańda barlyq naýqastyń jaǵdaıy turaqty.

«Ókinishke oraı, bir áıeldiń oń aıaǵyn saqtap qala almadyq. Aıaǵyn ampýtasıalaýǵa májbúr boldyq. Sol aıaǵy da synǵan, biraq biz oǵan shına saldyq, aldaǵy ýaqytta metaloosteosıntez jasap, aman saqtap qalamyz dep oılaımyz. Ekinshi bir áıeldiń bir aıaǵy jol-kólik oqıǵasy kezinde  kesilip ketken, oǵan da kómek kórsetip jatyrmyz. Ázirge ony ampýtasıalamaımyz, metalmen ustaımyz. Naýqastar uzaq ýaqyt boıy bizdiń travmatologıa bóliminiń bazasynda emdeletin bolady», – dedi Ivan Lı.

Eske sala keteıik, búgin elorda ákimi Baqyt Sultanov pen QR Densaýlyq saqtaý mınıstri Eljan Birtanov keshe iri jol-kólik oqıǵasynyń saldarynan zardap shekken azamattar em qabyldap jatqan qalalyq №2 kópbeıindi aýrýhanada bolyp qaıtty.

Aýrýhananyń bas dárigeri Ivan Lı qabyldaý, ıntensıvti terapıa, travmatologıa jáne jansaqtaý bólimderiniń jumysy týraly aıtyp berdi. Aýrýhanadaǵy 3N júıesi (shuǵyldyq sanatyna baılanysty naýqastardy suryptaý júıesi) men apattyq aqparat qyzmeti júıesiniń jumysy  kórsetildi.  

Usynǵan: Ásel Bolatqyzy