Namaz oqymaıtyn, ishimdik ishetin ári basqa da kúnálar jasaıtyn adamnyń orazasy qabyl bolmaıdy dep keıbir «bilgishter» aıtyp jatqanda, «Rasymen solaı ma?» degen saýal birden oımyzǵa orala ketedi. Negizinde, bul durys emes. Mundaı pikirler asyl dinimizge qarama-qaıshy keledi.
Eger adam naqty bir kúnálardy jasap júrse, ózge de kúnálardy jasaýy kerek deý bolmaıtyn nárse. Kimde-kim oraza ustaı júrip, keıbir kúnálardy jasap júretin bolsa, oraza úshin beriletin úlken syıdy almaýy múmkin, biraq aqırette «Nelikten oraza ustamadyń?» degen suraqqa alynbaıdy, óıtkeni ol oraza ustaý paryzyn ótedi ǵoı, endi sol ustaǵan orazasynyń arqasynda jasap júrgen kúnálarynan bas tartýǵa múmkindik alary ǵajap emes. Imam Rabbanı bylaı jazǵan eken: «Táýbege kelý men barlyq kúnálardan bas tartý uly nyǵmet bolyp tabylady. Eger adam barlyq kúnásynen bas tarta almasa da, keıbir kúnálary úshin táýbesine keler bolsa ol da nyǵmet bolyp sanalady. Múmkin ol táýbege kelý berekesiniń arqasynda basqa da kúnálarynan bas tartý múmkindigine qol jetkizetin bolady. Eger áldebir nársege tolyqtaı qol jetkize almaıtyn bolǵanda, tym bolmasa onyń bir jartysyna qol jetkizýden bas tartýdyń qajeti joq».
Bizdiń asyl dinimizde orazaǵa qaraǵanda namaz asa mańyzdy oryn alatynyna qaramastan, namaz oqymaıtyndarǵa: «Oraza ustamańdar», - dep aıtýǵa bolmaıdy, sebebi namaz oqymaı úlken kúná jasap júrgender endi oraza ustamaı da kúnáǵa batyp ketýi múmkin ǵoı...
Eger áldebir adam keıbir kúnálardy jasap júrgenimen de jyl saıyn orazasyn ustap, zeketin tólep júrgen bolsa, onda oǵan: «Bul amaldaryńdy tastama», - dep aıtý kerek. Óıtkeni adam atalmysh qulshylyqtardy da jasamaıtyn bolsa, onda ol dinimizden múlde alystap ketetin bolady. Belgili bir sebeptermen namaz oqı almaı júrgen adamdardy odan ary úreılendirmeı, kerisinshe, mundaı amaldardy jasaý arqyly qandaı syıǵa qol jetkizetinin aıtyp qýandyryp otyrý kerek. Hadısterdiń birinde bylaı aıtylǵan: «Kimde-kim ózgelerdi Allanyń raqymynan úmitin úzdirip, dinge degen jıirkenishin týdyratyn bolsa, soǵan laǵynet bolsyn. Jeńildetińder de qıyndatpańdar».
Kimde-kim jan-tánimen berilip sháhadat aıtar bolsa, sol musylman bolyp tabylady. Áldebir kúná jasap qoıǵany úshin ol dinnen shyǵyp ketpeıdi. Mine, áhlú súnnet ýál-jamaǵat aqıdasy osyndaı. Alaıda bul kúnálarǵa nemquraıly qaraý kerek degendi bildirmeıdi, óıtkeni kez-kelgen kúná adam júregine qara daq qaldyryp otyrady ári Tozaq otynda máńgige qalýdyń sebebine aınalyp ketýi múmkin. Joǵaryda aıtqandardy eskere otyryp, kez-kelgen kúnádan boıymyzdy aýlaq salýǵa tyrysýymyz kerek, óıtkeni Alla Taǵalanyń ashýy kúnálarǵa jasyrylǵan dep aıtqymyz keledi.
Lıza Darhanbekovanyń Facebook Imanashar paraqshasynda jarıalanǵan jazbasynan alyndy
Usynǵan: Nazerke Labıhan
